الأربعاء، 18 يونيو 2008

الحياة حلوة ... بس احنا اللى عاملين ريجيم !

عارفين يعنى ايه ريجيم من وجهة نظرى ؟ ..
يعنى انك تمتنع بمزاجك او غصب عنك عن حاجة انت بتحبها .. وتفضل الحاجة دى تظهرلك فى كل حتة وتفضل تحنسك .. تحنسك .. لحد ما تستسلم لها او تموت نفسك علشان تبعد عنها .. او تعمل فيها تلات رجالة فى بعض وتقدر فعلا تغمض عينك عنها وهى مالية عينيك !!
انا فعلا عاملة ريجيم .. مش بس ريجيم عن الاكل .. لا وكمان ريجيم عن الشغل .. وريجيم عن الخروج .. مع انى بحب الاكل .. وبعشق الشغل .. وبموت فى الخروج !!

(بس انا مش تخينة اوى يعنى لا مخكوا يروح لبعيد.. انا بس عاوزة ابقى سمبتيك !!)
بس ريجيم الاكل انا عارفة سببه .. لكن ريجيم الشغل والخروج .. حاسة انها حاجة كدا بالاكراه !!
يمكن لان الايام بقت شبه بعضها اوى .. مفيش جديد.. أو مفيش حدث فارق الواحد ممكن يبدأ من عنده اويعلم فى دماغه ..
بجد مبقتش عارفة .. هى الحياة وحشة واحنا اللى حلوين .. ولا الحياة حلوة واحنا اللى بقينا وحشين ؟!
ولا هى الحياة وحشة واحنا كمان وحشين .. ولا يكون الحياة اصلا حلوة واحنا بقى لما وحشنا وحشناها وخليناها هى كمان وحشة ؟!
وياترى هى اللى علمتنا نبقى وحشين .. ولا احنا اللى علمناها متبقاش حلوة ؟!
هى الناس اللى ماشية تكلم نفسها فى الشارع دى من الغلا والقهر .. ومش عارفين يعيشوا حياة حلوة .. عاملين ريجيم عن الحياة ولا مجبرين ؟!..
انا حاسة انى كبرت اوى .. مع انى لسة صغيرة اوى .. نفسى اعيش الحياة الحلوة .. وطظ فى الريجيم ..
نفسى الناس كلها يعيشوا الحياة الحلوة .. نفسى نعرف ان لما الكبير يدى -بزمة وضمير- زى الصغير.. الخير هايغرقنا كلنا ونقدر نعيش الحياة الحلوة ..
ياجماعة والله الحياة حلوة ..
اينعم مش بنلاقى اكل ولا لبس ولا مواصلات ولا تعليم ولا شغل ولا علاج ..
والحضارة منعدمة والتقدم غايب
بس صدقونى صدقونى ..
الحياة حلوة ..
احنا مش بعد كل الحاجات اللى مش بنلاقيها دى .. بنخرج نفس وبندخل نفس .. ولسة بنقدر نضحك ونلعب ونتريق .. ونعمل مقالب فى بعض كمان !!
يبقى لازم تبقى الحياة حلوة ..
عايشينها بالبركة ؟!
وماله ..ربنا ان شاء الله يبارك فى البركة ..وتبقى حركة .. ونتحرك معاها ..
ويمكن ساعتها نفك الريجيم - اللى احنا عاملينه بمزاجنا - وبأكد : بمزاااااجنا !!
ونشوف الحياة على حقيقيتها .. ويمكن نقدر نعيشها كمان
مش بعيد والله ..
الريجيم علمنى ابقى متفائلة .. واترفع عن كل احتياجاتى .. وعلمنى الامل فى بكرة .. مش انا لما افك الريجيم - هارجع تانى اكل اللى انا عاوزاه ؟!.. بس ساعتها هاظبط اكلى علشان مرجعش للريجيم الوحش دا تانى -
الريجيم قاسى .. ومتعب وبيدوخ .. لكن لما بتخيل نتايجه.. بتمسك بمتاعبه وبحبها ..وبتهون اوى عليا
يارب يكون اللى احنا فيه دا مجرد فترة ريجيم قاسية .. بنعملها علشان السمنة الحضارية اللى وصلنالها .. هانتعلم منها و هايتظبط بعدها وزننا ..ونرجع ناكل اللى احنا عاوزينه تانى ..
لكن ساعتها ياريت نظبط اكلنا علشان منتخنش .. منتخنش على الفاضى زى البالونة .. على قلة فايدة.. زى حالنا دلوقتى !!

السبت، 7 يونيو 2008

بيقولوا الحب ...



" بيقولوا الحب بيقتل الوقت .. وبيقولوا الوقت بيقتل الحب

ياحبيبي تعا تنروح قبل الوقت وقبل الحب

بديت القصة تحت الشتى .. بأول شتى حبوا بعضن

وخلصت القصة بتانى شتى .. تحت الشتى تركوا بعضن
حبوا بعضن .. تركوا بعضن

ياحبيبى شو نفع البكى .. شو الوا معنى بعد الحكى

مازالا قصص كبيرة ..

وليالى سهر وغيرة

بتخلص بكلمة صغيرة

حبوا بعضن .. تركوا بعضن "




طبعا كلنا سمعنا الاغنية العظيمة دى لفيروز .. الاغنية دى بتجسد معانى الحب عند كتير من الشباب دلوقتى .. يعنى الاغنية دى سابقة عصرها بجد .. فعلا الحب بالنسبة لمعظم الشباب دلوقتى بقى مجرد قتل للوقت .. تسلية .. وقت فاضى مش عارفين يعملوا فيه ايهوفعلا برده الوقت بيقتل الحب - وخاصة بعد الجواز - ومش بس الوقت .. الوقت والظروف المادية والاقتصادية والروتين ,

وكمان اغلب القصص دلوقتى لو قعدت من الشتا للشتا دا يبقى انجاز عظيم لانها فى الاغلب مبتكملش موسم واحد يعنى لو بدات فى اول الصيف - عن طريق مصيف ولا غيره - تخلص طبعا مع نهاية الاجازة ولو بدأت فى الشتا - فى جامعه ولا بتاع - تخلص مع نهاية العام الدراسى .. اما بقى فى الربيع الحياة بتبقى وردى شوية بس القصص بتنتهى برده .. والخريف كلنا عارفين - محدش بيبقى طايق نفسه - يعنى يافيروز ياحبيبتى احمدى ربنا ان اللى بتتكلمى عنهم حبوا بعض باول شتى وسابوا بعض فى تانى شتى .. وفعلا ساعتها وفى الحالات دى البكا مبينفعش لان الموضوع بيبقى انتهى خلاص وكل ليالى السهر والقصص اللى بتحصل دى بتنتهى طبعا لانها بتبقى وهم .. وهم بالحب والسهر والغيرة.. بتخلص بسهولةةةة بكلمة صغيرة اوى زى شكة الدبوس .. ويبقوا حبوا بعض .. وسابوا بعض ويرجعوا يحبوا تانى ويسيبوا تانى ويحبوا تانى ويسيبوا تانى .....


على كل لون يا بطيستا !!

ربنا قدر عليا اركب المترو من ايام ما كان بخمسين قرش .. من ايام ماكانت الشركة الفرنسية هى اللى ماسكاه ..

وبصراحة الشركة الفرنسية كانت مخلياه زى الساعه .. كان وقتها كل مترو كان بيجى كل خمس دقايق بجد... تحسب وقتك عليه .. مفيش حاجة اسمها يتعطل .. كنت توصل الميعاد بتاعك وانت مبدر خمس عشر دقايق كمان .. وكان بصراحة مواصلة ادمية يمكن اكتر من الميكروباصات والاتوبيسات .. مكان نضيف وجميل .. كنت بحبه اكتر من بيتنا .. ياااااه كانت ايام..

ولما دخلت ثانوى بقى كانت خلاص الشركة المصرية مسكته .. وما ادراكم بقى بالشركة المصرية!! ..

كنا بندخل المترو نقلبه قعده عرب ..نقعد ناكل ونغنى.. ونتخانق طبعا - لانى كنت بركب عربية السيئات قصدى السيدات فا مبتخلاش طبعا من الخناقات -وكنا بنعمل كل حاجة ..حتى المزاكرة لاننا كنا بنقعد وقت طويل اوى فى المترو رايح جاى رايح جاى ..

ولما دخلت الجامعة بقى بدات الاحظ حاجات غريبة اوى فى المترو .. لاحظت ان المترو مش بس بقى مجال للخناقات والحوارات والمناقشات السياسية والاجتماعية وحتى طريقة عمل المحشى بالبشاميل .. لأ دا كمان بقى اشبه بالسوق من بعد مانتشر البياعين اللى بيبيعوا كل حاجة .. كل حاجة بمعنى الكلمة .. يعنى لو قاعد وغمضت عينك وفكرت تشترى اى حاجة .. هاتفتح تلاقى بياع بيحطها على حجرك ..
دانا مرة راكبة المترو فى عربية الرجالة .. دخل عيل صغير بيبيع مرايات حريمى - من اللى بتتحط فى شنط البنات .. وقعد ينادى : ايوة المرايات.. اتفرجى يامدام .. المرايات ام اتنين ونص بعنها بجنيه وبس .. ايوة المرايات ..

وفجأة بيبص حواليه لقى كل اللى قاعدين رجالة ..!
استدرك بسرعة الموضوع وبدا يغير الندا وقال :

ايوة المرايات .. اتفرج على المرايات ياباشا مرايات لجمال بناتك.. بجنيه واحد وبس! طبعا امال يبيع ازاى .. الرزق يحب الخفية ولا ايه ؟!

وبدا البياعين يتحولوا من بيع الخمارات والاسدالات وادوات الميكب والشرابات لبيع الاغذية المجمدة والخضار المتقشر والبهارات علشان راحة الست اللى بتشتغل طبعا ..
ومين عارف بكرة هانلاقيهم بيبيعوا ايه تانى ؟!
ومع التطور الطبيعى لحالة الفساد اللى فى المترو، بدأ يظهر مش بس بياعين.. لأ وشحاتين كمان .. ودول بقى من كل نوع .. شحاتين بالشحتفة وشحاتين بالبلطجة .. دا غير موضوع الورق المطبوع اللى بيبقى مكتوب فيه .. انا اسمى وحيد و اعول اسرتى ووالدى متوفى .. وعلى فكرة كلهم اسمهم وحيد .!. دا حتى مرة بنت وزعت ورق مكتوب فيه انا اسمى وحيد برده ..
والوشوش بتاعتهم بتتكرر وكلامهم بيتكرر وكأنهم فاكرين اننا بنشوفهم لاول مرة .. يعنى مرة كنت قاعده فى المترو برده ودخل راجل كبير شفته كتير اوى كاشف رجله عن جرح كبير او حرق ..وقعد يحلف بصوت عالى : وربنا انا مش شحات .. اقسم بالله انا مش شحات .. وقعد يستخدم كل اساليب الشحاتة.. يعنى طلع فى الاخر ..شحات !!
وطبعا بلاش نسال فين شرطة المترو لانهم مبيظهروش الا لما يكون حد غلبان زى حالاتى كدا ضيع تذكرته غصب عنه واتقفش عند المكن وبيتعمله محضر ويتبهدل قال ايه علشان سرق البلد فى جنيه !!
وتذكرة المترو ركبت موضة الغلا هى كمان ووصلت من نص جنيه لجنيه .. سواء رايح محطة او عشرين هى برده بجنيه .. والاشتراكات كمان غليت .. على خيبة ايه.. معرفش؟!
دا حتى ياربى لما فكرت شركات الاعلان ترفه عننا و تعمل موسيقى تتسمع فى المترو علشان تهدى الركاب ..اعتبروها الناس صداع و تطرف و ضد الدين !!
ومن الحاجت اللى لاحظتها برده موضوع عربية السواق اللى بقت ميكروباص بقى عادى انك تلقى اتنين تلاتة راكبين مع السواق .. اتنين تلاته معارف للسواق او مش معارف متفرقش .. دانا حتى بيتهيألى انهم هايرموا السواق ويفضلوا هما .. ومش مقدرين خطورة اللى بيعملوه دا .. وكمان السواق مش مقدر اهمية شغله لانه ببساطة لو انشغل لحظة عن الطريق برغيه مع اللى معاه فى العربية ممكن يتسبب فى كارثة يروح فيها الاف من اللى بيتكدسوا فى المترو كل يوم ..
اخر موضة فى المترو بقى هو نقل عربية السيدات ..

نزلت مرة اركب المترو كالمعتاد ..لقيت علامات حمرا فى الارض مكتوب عليها سيدات .. قلت دا تعسف .. حاطين اسمنا فى الارض علشان الرجالة يدوسوا عليه .. طبعا ماهى عنصرية ؟!!!!!
وبعد شوية عرفت الخبر اليقين : الستات كانوا بيتخانقوا مع بعض قاموا دوشوا السواق وصدعوه وجابولوا تربنة وخلوه يلبس فى الرصيف ..فاقالوا احسن ينقلوا عربيات الستات فى نص القطر علشان لما تحصل حادثة ..الرجالة بس هما اللى يتعجنوا على الطرفين والستات يطلعوا سلام فى النص ..
وبأمر آمر اتنقلت العربيات .. وعلشان الشركة المصرية اللى ماسكة المترو .. وعشان ثقافة المصريين مبتقبلش التغيير .. بقت الرجالة بتركب عربية السيدات عينى عينك وقدام عساكر المترو كمان وكأنهم ماصدقوا ..بالرغم من اليافطة اللى تسد عين الشمس بتاعت " مخصص للسيدات فقط "
ولما تكلم اى راجل يقولك : ماهى الساعه عدت تسعه .. حتى لو الساعه 11 الصبح !!
لكن المترو دا بصراحة كان جامد اوى فى حوار واحد .. فاكرين اضراب ابريل .. المتروبقى .. كان المحرك الشعبى للاضراب دا .. كل الناس اللى كانت بتركب المترو عرفوا موضوع الاضراب من خلال المترو .. وكانت بتقام حلقات نقاشية سياسية كامله على الموضوع دا وحصلت قدام عينى والله .. وكانت هاتتحول لمظاهرة شعبية ضد الغلاء كمان!!
يلا ربنا يخليلنا المترو يارب ويطرح فيه البركة .. و ينضف شوية يارب وميتأخرش وميتعطلش .. دانا من غيره احتاس والله يارب .. دانا لما عطل العطلة الجامدة دى كنت هاتجنن ومعرفتش اخرج من بيتنا .. هو بالرغم من كل اللى حكيته من اسرع واكتر المواصلات ادمية لحد دلوقتى يعنى .. بس يارب نحافظ على اخر حاجة باقيالنا من مظاهر التحضر .. يارب يارب !!

يا اهل المغنى ....


صحيت من النوم الصبح على اغنية كلماتها ازعجتنى جدا ..واحد بيقول لحبيبته " خللى عندك دم وحسى شوية باللى انا فيه " وفى وسط الاغنية بيقولها " قصرى وهاتيلى من الاخر " وبعد كدا عرفت ان اللى بيغنى الاغنية دى هو رامى عياش .. يعنى هو مش مطرب شعبى ولا بيغنى اغانى هابطة ..
ياخبر .. دا حب ايه دا اللى كأنه فى خناقة .. حد يقول لحبيبته خللى عندك دم ؟!
الاغنية دى خلتنى افكر فى اغانى كتير من النوع دا .. اغانى لمطربين المفروض انهم محترمين وفنهم محترم .. يعنى انا مش هتكلم عن اغانى شعبية هابطة , زى اغانى اللى اسمه زعرور دا ولا بعرور .. ولا اغانى مسفة من امثال "حط النقط على الحروف " لان كلنا عارفين ان الاغانى دى اغانى افراح وميكروباصات ..
انا هاتكلم عن اغانى لمطربين مشهورين والمفروض انهم بيحترموا فنهم لكن للاسف بداوا يستخدموا كلمات ومعانى غريبة فى اغانيهم ..
يعنى مثلا تامر حسنى .. انا بعتبره فنان محترم وحساس اوى لكن سمعتله اغنية بيقول فيها فيما معناه يعنى " مش هارجعلك حتى لو وقفتى على ايديكى " واغنية تانية بيقول فيها " ارجعلك يعنى حرقة دم .. اسمعلك كل كلامك هم " ..
بزمتكم الكلام دا مش بتسمعوه دايما فى الخناقات؟
بهاء سلطان غنى وقال " قوم اقف وانت بتكلمنى " وفى اغنية تانية قال " صدقنى بقى ولا اسال بره "و كانه بياع فى سوق بيبيع شروة قوطة بالظبط !!
دا حتى ياربى محمد فؤاد انتشرت المعانى دى فى اغانيه زى مثلا اغنية " الله هو انا جيت جنبك .. الله هو انا كلمتك " وكأنه بيعاكس واحدة مش بيحبها ! وعندى نماذج كتير من امثال: بجد طلعت اى كلام , وعارفة عليك حاجات كتيرة مش تمام _ وكأنها عرفت انه نصاب او تاجر مخدرات _ ، وكتك ضربة فى قلبك وغيره وغيره ..
بقيت احس ان قاموس الروش طحن كله بتطوراته بيتنقل للاغانى .. وان كلمات الحب كلها تحولت لشتايم وخناقات ..
دا حتى لو كان الكلام دا هو اللى دارج فى لغة الشباب .. الموسيقى والاغانى لازم ترتقى بالاحساس مش تنحط بيه للدرجة دى يعنى اعتقد ان دى وظيفة الاغانى.. انها تعبر عن احاسيسنا ومشاعرنا ومشاكلنا بشكل مش مسف .. وعشان كدا بحترم مطربين زى عمرو دياب ومنير لانهم مخضعوش للموجة الجديدة وفضلت اغانيهم نضيفة واحسيسها عالية اوى ..
زمان ايام ام كلثوم واسمهان وعبد الوهاب حاربوا بشدة ظهور اغانى عدوية زى " زحمة يا دنيا زحمة .. والسح الدح امبو " واعتبروا انها بداية لانهيار الاغنية المصرية .. امال لو جم شافوا حال الاغنية المصرية دلوقتى على ايد مطربين كبار .. ياترى هايعملوا فينا ايه ؟!..
بجد ياجماعة عاوزين معانى راقية من تانى علشان منرجعش نستغرب ان كلام الشباب بقى كله خللى عندك دم وكبر وقصر ووجعتلى قلبى .. لان كلنا عارفين قد ايه الشباب بيتأُروا بالاغانى .. عاوزين كل اغانينا تبقى من امثال عارفة وتملى معاك وقلب واحد واحمر شايف ومين اللى جوة فى قلبى .. اغانى فيها معانى جميلة ترقى بالمشاعر .. تنقيها .. مش تخسف بيها الارض .. تهون علينا هموم الدنيا وبرده تناقش مشاكلنا بكل صراحة وحرية وعصرية .. ياريت

السبت، 12 أبريل 2008

ضحكة بنت اختى !

" سالت نفسى كتير مرستش يوم على بر ..
انا اللى فيا الخير ولا اللى فيا الشر ..
ولا انا جوايا ومش دارى الاتنين فى بعض؟!"



لأ..الانسان بيتولد بالخير والخير وبس .. من ايام ادم .. ادم اتخلق فيه الخير وعاش فى الجنة وخرج منها وهو لسة فيه الخير .. وبدأ ابناء ادم اول لما نزلوا على الارض يتعلموا الحقد والغيرة .. وقتل قابيل هابيل .." يتعلموا " يعنى الشر مش صفة فطرية فى الانسان .. الانسان الخير متأصل جواه والشر دا شئ مكتسب وكذلك المصلحة وحب النفس ..
فكرت فى الحاجات دى كلها وانا بتابع بنت اختى من اول ما اتولدت ولاحظت ان اول حاجة اتعلمتها كصفة مكتسبة هى الضحك .. وبقت بتوزع ضحكها على كل الناس ومبتبخلش على حد .. من اول ماتفتح عينيها ولحد ماتنام .. دا غير الصفة الفطرية واللى هى العياط .. يعنى لما تكون مبسوطة .. تضحك .. تعبانة او متضايقة .. تعيط .. صفات بسيطة جدا حسستنى اد ايه الانسان دا طيب ..

احنا اول ما بنتولد بنبقى عاملين زى حتة السفنج بنمتص كل التصرفات والافعال .. الحلو منها والوحش .. بنتولد واحنا صفحة بيضا كل الافعال اللى فيها نقية : الضحك والعياط واللعب.. بنحب كل حاجة ..وبنستكشف كل حاجة .. بنتولد بالصفات الحلوة بس وكل الصفات الوحشة بنكتسبها .. والشاطر بقى هو اللى يعرف يحافظ على صفاته الحلوة من الدنيا واللى بتعمله فى الواحد ..
ولاحظت حاجة كمان ان بشرى بتحس بالناس اوى .. ودى حاجة فطرية بتتخلق جوة الانسان .. بتحس باللى بيحبها وباللى بيعاملها وحش وتضحك لدا وتعيط مع دا ..

لكن فى العموم بشرى على طول بتضحك " ماشاء الله يعنى " حتى لما تتخبط او تقع بتضحك .. الكائن دا اللى عنده 8 شهور علمنى يعنى ايه تفاؤل .. بكون راجعة من الكلية شايلة هموم الدنيا كلها ومكتئبة وحتى مش قادرة اضحك .. اول ماادخل والاقيها عندنا .. تضحك لى ضحكة من الضرفة للضرفة .. مبقدرش اقاوم انى اضحك, واضحك من قلبى كمان وانسى كل هموم الدنيا .. ولما بتابع حركاتها وتصرفاتها بقعد اضحك اضحك اوى على الفطرية والطبيعية اللى بتتصرف بيها .. يعنى احساسها الطبيعى بالسعادة واللى بيخليها احيانا ترفص من كتر السعادة لما ازارتغير لها و تخليها سلبوتة "زى ماخلقها ربنا " ,بالرغم من ان التصرف دا ممكن يكون واحنا فى عز الشتا ..وتعيط وترفص برده من الزعل وهى بتلبس !! كمان احساسها الفطرى بانها عاوزة تستكشف كل حاجة بانها تحطها فى بقها .. اى حاجة ..صلبة سايلة سخنة بارده ..مش بتفرق معاها , المهم تدخل معمل الفحص "بقها " .. ولا لما حطت ايدها على الخلاط وحست بيه وهو بيتهز واتخضت اوى ودخلت فى حضن مامتها .. كل الحاجات دى حسستنى قد ايه ان الانسان بطبعه فطرى وطيب ,وان كل سلوكياته مهما كانت صغيرة بتبقى مكتسبة ,وان الفطرة فى الانسان الخير.. فاياريت بجد كلنا نقدر نحافظ على الخير الفطرى اللى جوانا .. ونبعد عن كل السلوكيات الوحشة اللى علمتها لنا الحياة ..لو كلنا وصلنا لده هانعيش حياة احلى .. هانحب من قلوبنا.. ونضحك من قلوبنا زى ضحكة طفل صغير عنده 8 شهور لسة الدنيا مقسيتش عليه ..
بس عارفين ؟ احلى حاجة عملتها بوشى فى حياتنا انها خلت بابا وماما - بعد مابقوا تيتة وجدو - انهم بقوا متمسكين بالحياة اكتر وبيحبوها اكتر .. حتى بابا بيقول ان محدش هايودى بوشى اول يوم الحضانة غيره ان شاء الله , دا غير انها خرجت الطفل الشقى من جوا بابا وخرجت كمية الحنية والحب اللى جوا ماما واللى مش بتعرف تعبر عنها بجد الا وهى شايلة بشرى وبس - بركاتك يابوشى ياجامد -
علشان كدا انا بحب بوشى وبحب ضحكة بوشى ويارب تفضل منورة حياتنا وملياها ضحك ولعب وحب ..
ها ..؟ عاوز تشوف احلى واروق واصفى ضحكة ؟....

"ضحكة بنت اختى "

" مين فى الحياة دى متولدش برئ مبنختلفش عن الملايكة فى شئ ..

والله يسامحها الدنيا بتغير .. واتارى البراءة عمرها قصير "

الثلاثاء، 8 أبريل 2008

هاتِضْرب .. هاتتضّرب !


سمعت عن الاضراب من مدونة زميل ,

اضراب 6 و7ابريل 2008 افتكروا التاريخ دا ..

لما سمعت عن الاضراب تحمست اوى ونويت اشارك يمكن يفيد وحاولت انشره على قد ماقدر .. هو اضراب عنوانه " خليك بالبيت وامتنع عن الشراء " بس كل ما كنت اتكلم مع حد يقولى مفيش فايدة ولا هايعمل حاجة اقوله بس اقعد فى بيتك وملكش دعوة بالتانيين .. والاضراب انتشر .. انتشر لدرجة ان بعض الناس الطيبين من شعبنا الطيب افتكروا انه مش اضراب .. دا اجازة .. والكل تعامل معاه على كدا ويمكن دا اللى دفع ناس كتير انهم مينزلوش من بيوتهم .. " كل يغنى على ليلاه بقى !" وماصدقوا ..يعنى المشاركة مكنش بالضرورة انه زيادة فى الوعى عند المصريين دى جت بالصدفة يعنى المدارس اللى كانت فاضية ,اكيد الاطفال مش فاهمين معنى الاضراب لكن اهاليهم خافوا عليهم من المظاهرات اللى ممكن تحصل فا خلوهم يغيبوا عن المدرسة ومش بعيد طلبة الجامعة كمان حصل معاهم كدا .. دا حتى فى اليوم دا كان عندى امتحان وقررت انى انزل امتحن وارجع على طول حتى من غير ما اشترى كيس مناديل من بره - مانا مش هاضيع تيرم علشان الاضراب .. محدش هاينفعنى لما اسقط! -

فوجئت بتليفون قبل الامتحان بساعات قليلة من صاحبتى امنية بتقولى ايه : ايار هو الامتحان اتلغى ؟!

قلت لها : لا ياحبيبتى مين قال كدا .. قالتلى : ماما .. مش انهاردة فيه اضراب .. ضحكت اوى وقلتلها .. ياريت ياحبيبتى بس انتى مسمعتيش بيان الحكومة اللى رعب الناس ؟! الامتحان هايتعمل شئنا ام ابينا .. نبقى نضرب بعديه بقى ...

فعلا بيان الحكومة بحظر الاضراب واستمرار العمل فى الهيئات الرسمية والتحذير بالجزائات للعاملين اللى هايتغيبوا دا كان سلاح ذو حدين .. يعنى كان مفيد ومضر مفيد انه عرف الناس اللى مكنوش يعرفوا عن الاضراب ويمكن دا خلق جواهم تحدى انهم يشاركوا بالعند فى الحكومة .. ومضر لانه خوف ناس كتير اوى انهم يشاركوا وكأن الحكومة بتقولنا : هاتضرب هاتتضرب والبادى اظلم يامعلم !..

وكمان اعلان الاخوان عدم اشتراكهم فى الاضراب - بالرغم من انى مفهمتش ليه اعلنوا كدا - الا انه كان مفيد للاضراب لان لو كان الاخوان اشتركوا كان ممكن يشكك فى دوافع ونوايا الاضراب لان الناس بتتلبش لما تسمع سيرة الاخوان وبيشككوا فى شرعية ومصداقية اى حاجة تيجى من ناحيتهم او يكونوا مشتركين فيها ..

بداية الفكرة اساسا كانت من عمال غزل المحلة اللى دعوا لاضراب عام وشامل لكل فئات الشعب للاعتراض على الغلاء ونقص الاجور ودا بالمكوث فى البيوت والامتناع عن الشراء لمدة يوم واحد .. اليوم دا انا نزلت من بيتنا.. الشارع طبيعى جدا .. مش فاضى ولا حاجة - مع الاشارة ان انا من احدى المناطق الشعبية - ركبت المترو .. المترو برده طبيعى جدا .. مش فاضى ولا حاجة ملفتش نظرى غير ست بتقولى انا كنت هاضرب بس اتصلوا بيا وقالولى هاتاخدى جزا نزلت جرى .. دانا حتى نازلة متأخر! .. وعدى اليوم طبيعى جدا برده من غير مظاهرات ولا حاجة !!

بالرغم من كدا قلت لنفسى : ولا يهمك يابت ارفعى شعار " ابدا بنفسك " وفضلت جعانة لحد ماروحت بيتنا - ادى ضريبة الاضراب !-.. وبعد ماروحت بدأت فى متابعة برامجى المفضلة اللى بعضها هلل للاضراب وفاعليته واظهروا صور للشارع المصرى فاااااضى الا من عربيات الامن المركزى اللى فعلا فاق عددها اعداد المواطنين اللى ماشيين فى الشارع ! , يعنى الحكومة بتجهض الفكرة وهى لسة فى الرحم , وبالرغم من كدا كانت الشوارع فاضية الا من الامن - امال لو كان اضراب كبير شوية ..كانوا هايعملوا ايه؟! -

اللى استغربت له بقى هو الجرايد تانى يوم .. الجرايد القومية صورت الدنيا بمبى وان مفيش اضراب ولا حاجة لأ وايه .. العمال انتجوا اكتر لتفريغ فكرة الاضراب من محتواه .. وطبعا جرايد المعارضة صورت الشوارع والجامعات فاضية ..وكأننا فى بلدين جوة بلد واحد ..ومتعرفش تصدق مين وتكدب مين وكل حد بيجيب لك ادلة وصور !!

وقالت صحف المعارضة ان الموظفين فى الهيئات والوزارات نزلوا خايفين الشغل الساعة 8 الصبح - يعنى قبل معادهم بنص ساعه - حتى الناس اللى متعودين يغيبوا نزلوا برده قبل معادهم ..لكن بذكاء وتحدى شعبى ساذج ..بعد مامضوا وضمنوا ميخدوش جزا .. روحوا بيوتهم الساعه10 الصبح ..يعنى مكملوش ساعتين !! .. اللى يضحك انهم قالوا ان محلات المسلمين قفلت يوم الحد التزاما بالاضراب ,لكن الحكومة اجبرت محلات المسيحيين انهم يفتحوا مع انهم معتادين ياخدوا اجازة فى اليوم دا !!!

اللى احزنى وعجبنى فى نفس الوقت هى احداث المحلة ,بالرغم من الهرجلة اللى حصلت والتخريب ..بس بجد بينت الشعب انه طهق بقى وبدأ يثور وان الناس مش هاتاخد على قفاها من الحكومة وتسكت زى المعتاد , الطريف هو موقف الحكومة .. بعد ما الدنيا ولعت وخربت مالطا ..نزل النظيف نظيف .. ومعاه الحاشية يقولهم : والله مكنتش اعرف ان الدنيا ولعت كدا ..طيب ومقلتوش ليه من الاول كنا عملنا اللازم !!.. وتكرم وتعطف عظمته و ادى شهر مكافأة لعمال المحلة .. قال يعنى كدا الناس هاتتكتم وتسكت " اطعم الفم يستحى العين " .. - طب والنبى تعالوا نحرق لنا كام محل على كام مدرسة فى القاهرة اذا كانت دى الطريقة اللى هاتخليهم يحسوا بينا !!! -

وفعلا اللى حصل فى المحلة دا انا متوقعة ان هايحصل زيه فى بورسعيد بعد اغلاق المنطقة الحرة , واسخم منه فى البلاد اللى الناس استصلحوا فيها الاراضى البور ودفعوا عمرهم فيها ,وجت الدولة بسهولة نزعت منهم اراضيهم علشان تبيعها لشركات يابانية استثمارية وبلاد تانية كتير بيحصل فيها حركات مستفزة اكتر .. اللى حصل دا مجرد درس اتعمله المصريين .. شعللها شعللها ..ولعها ولعها ..وهاتلاقى كله تمام .. والحكومة بتترعب وتبوس ايدك علشان تحقق لك مطالبك ..

يمكن الاضراب مكنش ناجح بنسبة ماية فى الماية لكنه خطوة اولى للعصيان المدنى , وتهديد مستمر للحكومة اذا مافاقتش من الغيبوبة اللى هى فيها ,

واحداث المحلة كانت مهزلة اثبتت سادية الامن المصرى , حتى ان الصور اللى اتنشرت حسستنى وحسست ناس كتير ان اللى بيحصل دا صور فى فلسطين او العراق .. نفس المنظر بنفس التفاصيل .. ناس بترمى طوب على مدرعات واطفال بتحتمى من الرصاص وناس واقعة , وناس بتجرى , ودخان قنابل مسيلة للدموع , ورصاص طايش بيصيب الشباب, واطفال بيعتقلوا بلبس المدرسة !!

مهزلة بكل معنى الكلمة وكأن الدنيا بترجع لورا مش بتتقدم والبلد بتخرب .. بس بالرغم من كل دا فهى خطوة لناس بتقول لأ.. وياريت كلنا نقول لأ .. لحد مايحسوا بينا العالم اللى عايشين فى ابراج عاجية دول !!

ربنا لا تؤاخدنا بما فعل السفهاء منا ....

السبت، 29 مارس 2008

العيب على مين ؟!


زى اليومين دول من اسبوع كان عيد الام .. انا مكتبتش حاجة يومها ..يمكن لان كلامى كان هايزعل ناس كتير فرحانة اليوم دا .. اول الناس دول هى انا .. انا اول واحدة كنت هازعل .. بس مش عارفة هازعل من نفسى ولا على نفسى .. ومش عارفة كمان كلامى اللى هاقوله دا ينطبق عليا انا بس ولا بقى حالة عامة ..

بجد ياجماعة احساسى بيوم عيد الام دا اختلف عن زمان كتييييير .. دا حتى زمان عيد الام مبفتكرش فيه غير الهدايا اللى كنت بديها للمدرسات بتوعنا بالغصب ..يعنى مش حب ولا حاجة !! .. وطبعا مفتكرش مرتين تلاتة جبت فيهم هدية لماما .. بالغصب برده ..

فى عيد الام اللى فات دا بالذات حسيت احساس غريب جدا احساس كدا وسط .. يعنى مش احساس فرحة وعرفان بالجميل زى ناس كتير , ولا احساس فقد لأم مش موجودة لانها بين ايادى الله .. لأ دا احساس اكثر عذابا .. احساس فقد لأم على قيد الحياة .. احساس فقد للتواصل والحنان .. احساس خلانى افكر فى علاقتنا كشباب بأُسرنا .. احساس خلانى افكر .. هو العيب على مين ؟!


يعنى زمان كان الاب له رهبة وبيرعب كل اللى فى البيت ومكنش حد يقدر يتكلم معاه فى حاجة تخصه .. وكانوا بيبرروا دا انه ادب واحترام !! وكان الكل بيلجأ لامه على اعتبار انها ملجأ الحنان والعطف والتفاهم .. و بالرغم من الاسلوب دا فى التربية كان غلط ,لكن يمكن كان بيحقق معادلة ان فيه طرف بيشد وطرف بيرخى ...

اما دلوقتى بقى , ومع التقدم الرهيب فى كل حاجة الشباب بطبعه بقى انطوائى ومش الشباب بس الاسرة كلها .. يعنى كل واحد عايش فى عالمه الخاص سواء قدام التليفزيون , التليفون, الكتاب, الانترنت , يااما برة مع اصحابه ,فى شغله , فى مدرسته وجامعته , وحتى الاكل بقى نشاط فردى كل واحد بيمارسه على حدا , والشباب - وانا واحدة منهم - حاسين ان اهلهم فى وادى وهما فى وادى.. وانهم بقوا مش قادرين يواكبوا تطورات العصر بكل معانى الكلمة , ومش قادرين يفهموا دماغ ولادهم اللى تطورت بحكم العصر , والاباء بقى كل همهم يلبوا طلبات ولادهم المادية يعنى الام - وامى واحدة منهم - تفكر ولادها اكلوا ولا لأ؟ لبسوا ولا لأ؟ الشقة متروقة ولا لأ؟- وحتى دا مبقاش بيحصل على اكمل وجه يعنى بقى دور فيه قصور كتير - والاب يفكر هو جاب لاولاده الكتب ودفع المصاريف وجابلهم احسن اكل واحسن لبس ولا لأ - ولا دا برده بقى بيحصل بحزافيره ماهى الدنيا بقت قاسية برده عليهم - وينشغلوا هما الاتنين - قصدى الاب والام - فى دوامة الحياة وقسوة الظروف المعيشية وينسوا ان ليهم دور اهم .. دور معنوى كبير يمكن هما بيأدوه بس مش على اكمل وجه ويمكن دا لعدم ادراكهم لمدى اهميته .. يعنى مثلا امى على سبيل المثال كل اللى يهمها ان الشقة تبقى متروقة وان الاكل معمول ومش مهم ابدا تعرف انا عملت ايه فى الجامعة .. كلمت مين وقابلت مين .. واتضايقت من ايه وفرحت من ايه .. يمكن فيه امهات كتير بتعمل كدا ودا نقص عندنا احنا بس .. بس الشائع فى كل الاسر دلوقتى ان طريقة المعاملة بين الشباب وابائهم اتغيرت وبقت اسوأ .. والعيب على الاتنين الشباب - وانا منهم - مش بيحاول يتواصل وبيفضل انه ينعزل فى عالمه الخاص مع اصحابه او قصاد النت على انه يروح يتكلم مع مامته , مع انى والله حاولت ميت مرة ومفيش فايدة .. والاهالى برده مش قادرين يفهمونا .. ولا يحتوونا ولا يقدروا قيمة دورهم المعنوى .. يعنى الحوار كبديل للعصبية والسيطرة .. الاقناع كبديل( ل هو كدا وخلاص ) ومش عاجبك نقى انشف حيطة واخبط راسك فيها .. دا حتى الاقناع بيربى عادة .. لكن فرض الراى بيكوّن موقف وقتى , يعنى لو بابا قاللى متروحيش المكان دا .. ليه ؟ ..هو كدا وخلاص , يمكن يبقى عندى فضول اروح ومش مهم ايه اللى يحصل , لكن لو قاللى متروحيش عشان كذا واقتنعت يربى عندى عادة وقيمة متتغيرش ابدا .. كل اساليب التربية دى اكيد اهلنا عارفينها بس بيريحوا دماغهم ومش بيطبقوها ... ويمكن احنا كمان بقت دماغنا ناشفة اوى ومش بنقتنع بسهولة .. لكن صدقونى الحاجة الوحيدة اللى انا متأكدة منها واللى هاحاول انفذها لما يبقى عندى اسرة ان "الام مدرسة" ودى مش شعارات دا كلام جد الام مدرسة للسلوك والقيم والاخلاق .. يعنى لو الام عصبية بتورث لاولادها العصبية ويطلعوا يتعاملوا مع الناس بعصبية .. ولو الام عندها ذكاء اجتماعى بتعلمه لاولادها .. ولو الام بتتكلم مع اولادها عمرهم مايطلعوا انطوائيين .. ولو الام حببت ولادها فى البيت عمرهم ماهايحبوا يبعدوا عنه .. دى دعوة ونصيحة لانى عانيت من التنشئة العصبية اللى من غير تفاهم .. دعوة لاصحابى البنات اللى هايبقوا امهات ,ودعوة للامهات اللى بقوا امهات , ودعوة لامى لو حد وصلها كلامى وحسته .. ياجماعة الام ليها دور كبير فى تشكيل شخصية ولادها .. ادوهم من الحنان لحد مايستكفوا ومتبخلوش بمشاعركم عليهم ابدا ومتخلوهمش يلجأوا لحد الا ليكم .. وحافظوا دايما على هدوء البيت وبلاش العصبية .. لانها بتورث مزيد من العصبية , واكتبى النصيحة دى فى كل انحاء شقتك ونفذيها .. لانى انا هاكتبها وانفذها:

" يجب ان تجعلى الاوقات التى يقيضيها اولادك فى البيت سعيدة , حتى يقضوا منها المزيد " ..

ربنا يخلي لنا بهبهاتنا ومهمهاتنا ويخلينا ليهم ونفضل مشيلنهم الهم كدا على طول ويستحملونا دايما .. امال خلفونا ليييييييييه ؟!

الجمعة، 21 مارس 2008

جدد طريقة وضوئك ..


بمناسبة مولد النبى كمان فكرت اعرض عليكوا مجموعة من الادعية اللى انا شخصيا بقولها اثناء الوضوء .. الادعية دى كنت قريتها فى كتاب إحياء علوم الدين وحفظتها عن ظهر قلب ..وجددت بيها طريقة وضوئى ..ويارب انتوا كمان تقروها وتحفظوها وتقولوها فى سركم اثناء الوضوء ...


فىبداية الوضوء نقول :

"بسم الله .. اللهم انى اعوذ بك من همزات الشياطين واعوذ بك ربى ان يحضرون ."

عند غسل الكفين :

" اللهم اعطنى اليمن والبركة "

عند المضمضة :

" اللهم اعنى على تلاوة كتابك "

عند الاستنشاق:

" اللهم اجعل لى رائحة الجنة "

عند الاستنثار :

" اللهم انى اعوذ بك من رائحة النار "

عند غسل الوجه :

" اللهم بيض وجهى يوم يبيض وجوه اوليائك اللهم انى اعوذ بك ان تسود وجهى يوم تسود وجوه اعدائك "

عند غسل اليد اليمنى :

" اللهم اعطنى كتابى بيمينى وحاسبنى حسابا يسيرا "

عند غسل اليد اليسرى :

" اللهم انى اعوذ بك ان تعطنى كتابى بيسارى او من وراء ظهرى "

عند المسح على الرأس :

" اللهم اظلنى بظلك يوم لا ظل الا ظلك "

عند مسح الاذنين :

" اللهم اجعلنى ممن يستمعون الى القول فيتبعون احسنه اللهم اسمعنى منادى الجنة مع الابرار "

عند مسح الرقبه (وهى ليست من فرائض الوضوء ) :

" اللهم اعتق رقبتى من النار واحفظنى من الاغلال والقيود ."

عند غسل القدم اليمنى :

" اللهم ثبت قدمى على الصراط المستقيم يوم تذل الاقدام فى النار "

عند غسل القدم اليسرى :

" اللهم انى اعوذ بك ان تذل قدمى فى النار يوم تذل اقدام المنافقين "

بعد الوضوء نقول :

"اشهد ان لا اله الا الله واشهد ان محمد رسول الله .. اللهم اجعلنى من التوابين واجعلنى من المتطهرين "

كدا خلصت الادعية واحب اقول ان الادعية دى مختصرة شوية ,انا اختصرتها علشان اقدر احفظها واقولها .. اللى يحب يطلع عليها كاملة يراجع كتاب إحياء علوم الدين باب الوضوء عسى الله ان ينفعنا بها واياكم .. امين يارب العالمين ..

الليلة الكبيرة ياعمى والعالم كتيرة ..


امبارح كان مولد النبى ..
كل سنة وانتوا طيبين ..
قبل التدوين المناسبة دى كانت بالنسبة لى مجرد ان بابا بيجيب لنا حلاوة المولد وناكلها وكان الله بالسر عليم .. واحيانا بس مش كتير كان بابا بيكبر دماغه ومش بيجيب حاجة .. لكن لما عملت المدونة وجات المناسبة دى قررت انها متفوتش كدا .. وان انا لازم اكتب انطباعاتى عنها .. فقلت ياترى اكتب ايه ؟!
لما ببص لمصر وخاصة فى منطقتنا كل سنة بلاقى نفس التقليد .. اربع خمس نصبات تتنصب .. تواشيح غريبة كدا تشتغل معرفش دا مدح للنبى ولا ايه .. وحلاويات من كافة الاشكال وعرايس وحصنة من السكر .. واللى تطورت دلوقتى وبقت عرايس بلاستيك بتنور ...
وسمعت فى برامج وفى الجرايد - وانا مع الراى دا - اننا مش المفروض نحتفل بالمولد النبوى بالشكل دا يعنى مجرد حلويات وخلاص .. لان هدف الاحتفال بمولد اشرف الخلق عليه افضل الصلاة والسلام واللى كان يوم وفاته كمان .. اننا نحيي سنته من صوم وصلاة وزكاة واكرام الجار وصلة رحم وكل مكارم الاخلاق اللى بنقتدى بيه فيها يعنى مش مجرد شوية حلويات وعروسة حلاوة - الشيوخ قالوا انها تماثيل والمفروض انها لو اشتريناها ناكلها على طول او تبقى مقلوبة على وشها - بس انا شايفة اننا كدا بنحبكها اوى يعنى علشان اوضح وجهة نظرى .. انا شايفة ان الاحتفال اللى احنا بنشوفه لمولد النبى دا من التقاليد .. والتقاليد القديمة اوى كمان ,وان دا كدا زى الفلكلور حاجة وارثينها عن جدودنا وجدود جدودنا وحلو اننا نحتفل بيه لكن الاهم من شكل الاحتفال دا هو ان كل واحد يحيي سنة النبى صلى الله عليه وسلم فى قلبه وعقله وتصرفاته .. مش تبقى مجرد شكليات وخلاص ..
كلمة مولد النبى دى فكرتنى بالموالد اللى بتتعمل لناس كتير اوى اغلبهم معرفهمش .. زى مولد السيدة والسيد البدوى ومولد سيدى الطشطوشى و مولد سيدى القناوى ومولد سيدى محمد البحر ومولد سيدى الشعرواى ومولد سيدى الدسوقى -طبعا دول ولا سيادى ولا اعرفهم بس هما بيقولوا عليهم كدا - وموالد كتير فى كل انحاء مصر فى القاهرة وطنطا وكفر الشيخ وغيره وغيره ولكل منطقة مولد خاص بيها .. الموالد دى بكل الممارسات اللى فيها نوع من الفلكلور ..لكن برده مش لازم نسلم بصحتها وخاصة الحضرة وحلقات الذكر ولا الستات اللى بيبقوا راكبين على عربيات كارو ونازلين زغاريد ! وكأنهم مكبوتين وبيخرجوا طاقة وخلاص !.. دانا سمعت كمان ان فيه موالد للمسيحيين زى مولد جبل الطير واللى بيعملوه على جبل .. بس برده الفضول بيدفعنى دايما انى اروح اشوف العالم دا ايه اللى بيحصل فيه .. انا كل صورتى المرجعية عن المولد هو اوبريت الليلة الكبيرة والافلام مش اكتر .. اللى بيبيعوا فيه حب العزيز والحمص وفيه زق الطارة وفرقعة البومب والنشان ..لا والاهم رقص الغوازى !! ونحط عند دى ميت خط - يعنى مولد مبروك لحد مبروك ويبقى فيه رقص ومسخرة .. دى ازدواجية فى الرؤية ولا ايه .. يعنى المفروض المولد دا هدفه دينى ليه يتحول بالشكل دا .. لا تعليق - ..
والمولد برده - على حسب ثقافتى الافلامية - مبيخلاش من عيل ولا عيلة تايهة , وساحر بيلعب بالبيضة والحجر ,وحد بيرقص قرود ويروض حيوانات مفترسة, وناس قاعدة على القهاوى .. عالم لوحده المولد دا لا واهدافه متعددة كمان وبتختلف من حد للتانى .. انا اعرف ناس كل هوايتهم فى الحياة يلفوا على الموالد مش علشان ذكر ولا بتاع بس اهى فنفنة وجو جديد !.. وللاسف بابا مرضيش اروح معاهم احضرلى مولد انا كمان .. بس انا والله نفسى اروح مولد .. يعنى من باب العلم بالشئ ..واعتقد انها هاتبقى مغامرة حلوة .. محدش يعرف مولد قريب ينفع اروحه ؟؟ ولا حد راح مولد قبل كدا يعرف يحكيلنا الحاجات اللى بتحصل بالظبط ؟؟
هاستنى ردودكم .. يلا اما اقوم اسوس لى سنتين بحلاوة المولد .. سلام !

الخميس، 13 مارس 2008

خدوا بالكوا .. من حماركوا !!


تفتكر انت كلت كام حمار لحد دلوقتى ؟!

متستغربش ..
انا برده استغربت من السؤال دا فى الاول ..
لكن السؤال بقى منطقى لما عرفت الحكاية اللى هاحكيهالكم دى..

من فترة قريبة قعدوا يقولوا ان الجزارين بيدبحوا الكلاب ويعملوا منها الكفته .. طبعا انا مصدقتش .. بسذاجتى المعهودة .. وحتى كنت بتريق على الكفتة اللى بنجيبها وبسميها " كفتة كلابى " وباكلها عادى ..وبعد كدا برده سمعت عن ان الجزارين بيدبحوا الحمير ويبيعوها على انها لحمة عجل او بقر .. وبرده مصدقتش .......


لحد ماشفت بعنيا ..

قصدى شفت بعين نجاة ..

الصحفية اللى اتخفت ودخلت وكر باور فاميلى ( قصدى دخلت وكر الجزارين ) وصورتهم وهما بيدبحوا الحمير .. وبيشفوا الكلاب -والله كتر خيرهم مش هايبيعوها بعضمها - نط فى دماغى على طول حكاية سمعتها بالصدفة من حسام اخو ايناس انتمتى ..حسام دا عنده حوالى 13 سنة .. راح حذر مامته وقالها ياماما متشتريش كفته من الكبابجى اللى على ناصية شارعنا علشان انا شفت الصبى بتاعه بيجر كلب ميت ويوديه ناحية الحتة اللى بيعملوا فيها الكفتة- يعنى كلب .. وميت ..سبحان الله !! - فقررت انا وايناس وعيلتنا وعليتهم .. منكلش من الكبابجى دا ..

لحد ماسمعت قصة نجاة .. وشفت بعينى محدش قالى .. قررت انى مش بس اقاطع الكبابجى انا قررت مقاطعة اللحوم حتى اللى ماما بتعملها لمدة شهر - لحد مانسى - ومقاطعة اللحوم اللى بتتباع بره لاجل غير مسمى - لانى معتقدش انى هانسى - ..

يعنى المسألة مجتش عند بيع لحوم فاسدة ولا مريضة ولا منتهية الصلاحية .. ولا حتى حيوانات ميتة .. الموضوع بقى اكبر من كدا نجاة الصحفية بجريدة 24 ساعة بتقول :ان اللى شفته دا فسر لى ازاى بيبقى سندوتش الفول بجنيه وربع .. ورغيف الحواوشى بنص جنيه فى مناطق كتير وان كيلو اللحمة فى العتبة بستة جنيه ! الموضوع دا كان فى العاشرة مساء ..

منى طبعا مسكتتش واستضافت مسئول .. بصراحة هو محلش حاجة لكن ادانا معلومات مهمة احب اقولهالكم ...


# فى البداية ارجع الازمة دى لنقص عدد الدكاترة البيطريين لان عدد الدكاترة البيطريين 7 الاف دكتور بس فى مصر كلها ونصهم مشغولين فى مكافحة انفلونزا الطيور - منين فيه بطالة ومنين فى عجز فى عدد الدكاترة ؟! يلا يابتوع طب بيطرى هيصوا !! -
# وقال ان لحمة الحمار وهى نية لونها غامق ولو قعدت فى الهوا شوية يتحول الى ما يشبه الصدا - يع -
# عضلاتها رفيعة بعكس البقر والجاموس - ودى حاجة يفهم فيها ستات البيوت بقى -
# لو اتدبسنا فيها واشتريناها بتعمل بقع دهنية عند سلقها وبيبقى طعمها مسكر !
# وعشان كدا نصح بالتعامل مع جزار موثوق فيه - انا بقيت اشك فى نفسى اصلا ! -
# ولا عزاء بقى للى بياكلوا بره لان اللحمة لما بتتطبخ او تتفرم .. انتهت .. ولا هاتحس بحاجة!!

الغريبة بقى انى سالت نفسى سؤال :
هو يعنى الناس اللى بتعمل كدا دى مش خايفة تقع فى نفس الحاجات - ولا هما بقوا خبرا - يعنى من باب "من حفر حفرة لاخيه وقع فيها" يعنى مش شرط ياكلوا لحم كلاب ولا حمير لكن ممكن يقعوا فى لحوم فاسدة - ويغوروا فى داهية بسببها - اصل داين تدان والله ..
ولا حتى مش خايفين يقعوا فى العصير اللى مغسول فى البانيو واللى معصور فى الغسالة واللى بتقدمه افخم الفنادق .. ولا مش خايفين ياكلوا فراخ ميتة فى كنتاكى ؟!

حادثة نجاة دى كانت فى البساتين وهى قالت ان اللحوم دى بتتوزع فى كل انحاء مصر .. مع ان الحمير غالية والله مش عارفة ايه اللى جابرهم ؟!
انا مش محتاجة طبعا بعد اللى قولته دا اقولكم حالتى بعد ماشفت الصور بقت ايه ..
ورحت تانى يوم الجامعة قرفانة حتى من نفسى وعمالة اشك فى كل حاجة واى حاجة وقررت اكل فول وفول وفول لان حتى الطعمية والبطاطس زيتهم بيبقى استغفر الله العظيم ..
المهم بقى التعليق اللى عجبنى ان واحد بيقول ايه :
احنا بنعتمد فى الاول وفى الاخر على معده المصرى اللى بتهضم الزلط ..
وربنا شعب غلبان !

وبرده مش محتاجة اوجه دعوات شديدة اللهجة للى بيقروا الموضوع انهم لازم يقاطعوا اكل الشارع - حتى فى المطاعم الفخمة - لان اللى قريتوه كافى ... لكن هاوجه تحذيرات شديدة اللهجة لصاحبى الحمير ..
ياجماعة خدوا بالكوا من حميركوا ..
علشان منسمعش فى الفترة الجاية عن سرقات للحمير تستقر فى بطون المصريين !!!
وفى نهاية كلامى احب اوجه سؤال برئ للفنان العظيم سعد الصغير .. اللى غنى الاغنية العظيمة " بحبك ياحمار" :
ايه احساسك بعد الموضوع دا ؟؟؟؟؟!!

الثلاثاء، 11 مارس 2008

انا والاخرى ..


استتحدث عنى ؟!

استقـــــــــول لها انى توجتـــــك ملكا على عــــــرش حيــــــــــــــــــاتى ؟!

ورســـــــمت الدنيا بعيــــــونك وراحـــــــتك كانت اعظم امنيـــــــــــــــــاتى

ام ستقـــــــــول غادرة .. وبعد فراقنا صـــــــــارت تضحـــــــك من انــــاتى

باعت ؟! .. اضاعتنى وضاعت ؟ ام نسيت حب الماضى فى لحـــظة وخانت

استكون سعيدا لفراقنا؟! .. ام تتمــــــــنى لو عـــــــــــــــادت ايامـــــــــــنا

وتقـــــــــدر ظـــــــروف مــــــرت كانـــــــــت اقـــــــوى من احـــــــــلامـنا

استطـــــــــــرق عندما تتــــــــــــــذكرنى ؟ حتى تغـــــــــــــــار هـــــى منى

ام تنسى ذكــــــــــــــــراى كأنى .. كنت اكبـــــــــــــــر غلطــــــــات حــياتك

وتظـــــــــــــــــــهر كبرك وعنــــــــادك .. وتذكر انى لم اخطر مرة ببـــــالك

ظللت افكر وافكر ولكن ..

برغـــــــــــــــــــم كل افتراضــــــــــــاتى .. ستظــــــل ذكراك تعطر اوقــاتى

واملى ان تعـــــــــــــــــوضك هى عنـــى .. وتشرق مستـــــــــــــقبلك الاتى

الجمعة، 7 مارس 2008

ايه يا جماعة ؟!


ايه ياجماعة محدش بيزورنا ليه على مدونتى انا واحمد ولا شفت ولا تعليق يوحد ربنا .. عيب كدا الواد جاله احباط من تحت الباط .. تعليق ياولاد الحلال .. يقعدلكوا فى مدوناتكم كدا ان شاء الله .. انا هاشحت ولا ايه .. انا كتبت اجدد موضوعاتى هناك .. وادى اللينك بتعها علشان مش يبقى ليكوا حجة :
يوميات محامى مبينمش واعلامية مهيسة ..

انا انسانة بلا ماضى.....


كتير من الناس بيقولوا " اخر العنقود سكر معقود " .. اكيد طبعا لان انا اخر العنقود.. مع ان احنا عنقودنا قصير اوى مفيهوش غير حبيتين بس ..هما انا واختى , والناس بيقولوا كمان ان اخر العنقود دا دايما بيبقى متدلع .. لكن فى دى انا مش موافقاهم 100% - او على الاقل فى حالتى انا - ..
احكيلكم من الاول ..
كان ياما كان فى سالف العصر والاوان وتحديدا يوم 10 3 1978 ...اتولدت كريمة الصون والعفاف اذار حسن - عاوزة الهدايا ترف عليها بقى! - وكانت المولودة الاولى لابويا الكاتب العظيم حسن ابو العلا .. وطبعا طار بابا من الفرح .. وساعتها كانت ايام عز .. وكان عندنا كاميرا ..ولان اختى كانت المولدة الاولى ..بابا طبعا كان هاريها تصوير .. من اول يوم اتولدت فيه ..وهى نايمة وهى قايمة وهى بتبربش وهى بتتاوب الخ الخ الخ .. يعنى كان متابع كل تحركاتها .. وطبعا صور اول صرخة واول خطوة واول سقفة وكله كله .. ولما كبرت اذار .. هما مسكتوش .. اول عيد ميلاد ليها دا كان يوم مشهود .. وكل الصحف والمجلات كانت بتصور - مش اوى كدا يعنى دا من نسج خيالى! - وبابا صورها وهى مركزة اوى فى طبق الملوخية .. وانا مبنساش الصورة دى وبتموتنى من الضحك وكان كل اعمامى وخالاتى وعماتى بيتعزموا - هما مش كتير يعنى بس برضه -.. وصورها وهى على المرجيحة دا غير الخروجات .. اشى جنينة الحيوانات والملاهى والمصايف وكله تصوير تصوير تصوير .. فاضيين بقى موارهمش حاجة .. وتمر عشر سنين طوال عراض ويحصل فيهم اللى يحصل ..ويشرف جنابى .. ويحالفنى سوء الحظ من اول لحظة .. بداية بابا مكانش عاوزنى .. ولما تقبل الوضع .. كان متخيل انى ولد .. قال ايه لانه زهق بقى من البنات وعاوز ولى العهد اللى يشيل اسمه , ولما جيت بنت بابا كان منفضلى تنفيضة فُل .. لا وجاتله الجراة انه يعترف لى لما كبرت انه مشالنيش الا لما بقيت شهرين ..تخيلوا !.. لا وايه .. لما ضحكتله قوى وشابيت عليه , قال :بنتى بقى ومبدهاش - وهو مينكرش انه وقع فى غرامى من ساعتها !! - اللى يضايق بقى انه فى الفترة اللى انا جيت فيها كانت كاميرتنا باظت .. وطبعا مكناش لسة دخلنا عصر تكنولوبيا الموبايلات والذى منه .. وعشان كدا اول الصور اللى اتصورتها كانت الصورة اللى قصادكم دى - واللى انا فيها عندى حوالى سنة - وكمان متصورة فى استوديو .. لما ماما فاقت وقالت نصورها .. وشوية صور قليلة جدا لا تتعدى صوابع ايدك الواحدة ..تخيلوا ياجماعة لما تبقى انسان ناضج زيي ومتعرفش شكلك وانت نونة كان ايه ..احساس وحش اوى صدقونى .. بغض النظر عن ان الخروجات اتقطعت ومتفسحتش نص فسح اذار .. ولا اتعملى عشر تلاف عيد ميلاد زيها اهئ اهئ اهئ .. انا مش بحقد عليها والله .. انا بقر بس ! .. انهاردة كنت عند اية صاحبتى وشفت كل صورها وهى بابى .. واتضايقت اوى .. وزعلت من بابا وماما اوى اوى .. وملقتش حد اشتكيله غيركم .. يعنى انا ذنبى انى اتولدت لما بابا وماما كبروا ؟ ولا ذنبى انى اتولدت لما الكاميرا باظت؟ ولا ذنبى انى محفظتى ضاعت وخدت ماضيا كله معاها .. حتى صور ثانوى واعدادى ؟؟؟! وبعدين قلت لاية :"يعنى انا لو اتجوزت دلوقتى جوزى هايلاقى ايه يقعد يتريق عليه ؟؟؟! " .. عيب كدا والله .. وعشان كدا انا نازلة تصوير فى بشرى بنت اختى وتقريبا بصورها كل يوم .. والحمد لله اننا دلوقتى عندنا 4 موبايلات بكاميرا - ماشاء الله يعنى- ...وكمان بروق نفسى انا دلوقتى ومبسبش فرصة انى اتصور فى اى مكان اروحه ..انشالله مراجيح السبتية ! وعلشان مكنش ظالمة انا دلوقتى قلب بابا وعقله وبجد بيدلعنى موووت وبيثقفنى كمان .. وزى مابيقولوا ان انا اللى على الحجر .. وقالى كدا فى قعدة صفا : " والله ..الله يكون فى عونه اللى هايتجوزك دا ..هاياخدك من حبابى عينيا" انبسطت اوى من الكلمة دى وكان نفسى اخده بالحضن لولا اننا كنا ماشيين فى الشارع .. وبجد سامحته على انه مصورنيش .. وقلت يلا خليها عليا انا الكبيرة ..
عشان كدا بنصح كل اللى بيسمعونى - والله مالينا الا بعضينا على راى هنيدى !- المهم بجد حاولوا كدا لما ربنا يكرمكوا وتخلفوا تسجلوا كل لحظة لاولادكم من اول ولادتهم وفسحوهم وخرجوهم .. عشان ميطلعوش معقدين كدا زيي .. ومتتصوروش الموضوع دا بيفرق مع البنى ادم قد ايه... اتفرجوا بقى على كليب انا عاملاه لبنت اختى .. ربنا يخليها لينا ياااارب وتفضل منورة حياتنا دايما !!

الاثنين، 3 مارس 2008

هاسيب الصور تتكلم ..




انا عندى اكتئاااااااااااااااااااااااااااااااب !!

والنبى يا جماعة حد يقولى ارجع ثقتى فى نفسى كانسانة ,وثقتى فى الحياة ازاى .. كل الناس عمالة تقولى انتى ليه عمالة تكتبى فى السياسة ومش بتكتبى فى الحب والكلام اللى يأكل عيش دا ..بس بالله عليكم قولولى فى وسط كل اللى احنا فيه فى حياتنا دا ازاى الواحد يحب نفسه حتى .. يعنى انا طالبه فى السنة الاخيرة والله والله ماببقى عاوزة انزل من بيتنا لانى عارفة انى فى اخر اليوم هارجع مغمومة .. ان مكنش من ناس مش بتراعى ضميرها فى شغلها ومقضينها والسلام ..و داخلين اعلام مجموع واهى اسمها شهادة وخلاص علشان يعرفوا يتجوزوا جوازات كويسة , يا أما من المشروع اللى مش عاوز يخلص لان الدكتور بتاعنا بيحتقرنا وحاسس انه ابو العريف واحنا دون مستوى تفكيره العبقرى !..يا اما من الغلا واجى عند الغلا بقى واقول قصايد .. يعنى تذكرة المترو غليت ..الاكل فى الجامعة الحاجة اللى كانت بجنيه بقت بخمسة ,والمواصلات فى الرجوع ,ولا اللبس بقى بيزيد بالاضعاف ومبقتش عارفة اشترى لبس , دا حتى الفول والطعمية مبقناش نعرف نشتريهم ..لا وعمالين يغلوا فى السماد يعنى الاكل هايغلى اكتر واكتر ومش هانلاقى ناكل اصلا ونبقى نعض فى بعض بقى.. وساعتها بقى ها نسمع عن شهداء طوابير العيش والطماطم والفول والبتنجان كمان , ولا الكتب اللى بقت نار والدكاترة اللى على قلبهم قد كدا ومش عاجبهم .. قال ويقولوا مجانية تعليم قال ! بلا وكسة..وانا من طبقة متوسطة ,ومقولكوش يقى على خناقات البيت على الفلوس ...الحياة بقت صعبة ياجماعة حب ايه وبتاع ايه .. كل يوم نسمع عن اضرابات وناس بتحتج عشان الاسعار والمرتبات فى كل القطاعات دا حتى الدكاترة والمحامين, وكل يوم نسمع عن فلوس بتتهرب وبتتسرق بالمليارات .. انا وربنا قعدت افكر لو وقع فى ايدى الف جنيه.. مقدرتش اتخيل ممكن اعمل بيهم ايه , وهما بيتكلموا على المليارات كأنهم بيتكلموا عن تلاتة جنيه ..والله كنت قاعدة بتفرج مش عارفة على برنامج ايه فبقول لبابا احنا ليه فقرا ؟ قالى علشان احنا نضاف ومش حرامية .. قلتله طيب وليه متشتغلش حرامى ؟!وفعلا والله كنت بتكلم بجد .. اصل مصر دلوقت بقى فيها ولاد ناس وولاد كلب .. ولا عيب نشتم الكلاب ...احنا اقل من كلاب وقطط الفنانين اللى ليهم نقابات وبيعملوا باديكير وبيدّفع عليهم الاف ..ويقولوا لى احب .. حب ايه اللى انتوا جايين تتكلموا عليه ..
الكلية منها لله قالت لنا عندكوا امتحان شفوى فى المعلومات العامة تابعوا احداث الدنيا .. وبصراحة بدعى عليهم لحد دلوقتى .. لان حال الدنيا ميسرش من اول اعلانات التبرع لايتام الصعيد والايتام المعوقين ومستشفى السرطان - قال يعنى احنا لاقين نأكل نفسنا لما نتبرع ..وهما بيلعبوا على عواطف الغلابة .. واللى على قلبهم قد كدا محدش بيصعب عليه .. والله داحنا اللى عايزين حد يتبرع لنا - اقول ايه ولا ايه اقول على اليهود اللى بيحفروا تحت المسجد الاقصى ولا اقول على اسرئيل اللى مورية غزة الويل والكل بيتفرج ولا اقول على سماح المصرية اللى اتضربت على الحدود ومحدش حتى ندد ولا استنكر- الله يرحمك يانخوة .. الله يرحمك يارجولة كنتى زمان وجبرتى من قلوب المصريين - داحنا حتى مش عارفين نحتج ! , وجايين تقولوا لى حب .. حب ايه دانا هانفجر .. دانا هاطق ..دانا هايطلعلى مرارة جديدة غير اللى فرقعت علشان تفرقع هى كمان ...يلا نروح ننتحر جماعة ولا نعلن اضرابنا ولا نعمل اى حاجة .. انشالله نعمل عمليات ارهابية ضد نفسنا ..الله يلعن ابو الثقافة على يلعن ابو الكلية اللى بتثقفنا .. انا بعلن يا جماعة وبقولها باعلى صوت .. انا عاوزة ابقى تافهة .. مش عاوزة افكر .. وبدعو الكل انه يبقى تافه .. وانه يبطل يفكر ..وعاوزة تبقى اولى اهتمامتى الموضة والميك اب والكليبات الهلس ..بلا اسرائيل بلا فلسطين بلا وجع قلب ولو انى حتى مش هاعرف اشترى الميك اب دا ..لكن وماله اللى معرفش اشتريه .. (اتخيله ).. وبالمناسبة دى .. حد عنده اى معلومات مفيدة ازاى ابقى تافهة ؟!!!!!!!!!!!!!!!!!!!!!!!!!!!!!

السبت، 1 مارس 2008

الحكاية دى مش بتفكركوا بحاجة !

ايام الحاكم معاوية بن ابى سفيان امير المؤمنين دخل عليه ابو ذر الغفارى- احد صحابة الرسول صلى الله عليه وسلم -وهجاه هجاء قاسى , فأمر خدم قصره بأن يخلعوا عليه خلعة - والخلعة هى مايماثل ملابس السلطان او الحاكم نفسه - فكل حاشية معاوية استغربوا جدا وسالوه: كيف تأمر له بخلعه وقد هجاك هجاء شديد كهذا؟! فقال لهم :

" لا احول بين احد وبين لسانه ,

مادام لا يحول بينى وبين سلطانى "

- قد ايه جملة مستفزة .. لكن حقيقية - انا فى مكانى وقاعد على قلبك .. قول اللى انت عاوزه بقى بعد كدا .. الحكام دلوقتى لازم يتخلعوا من مكانهم بالقوى الجبرية او الثوارات الشعبية او الانقلابات العسكرية .. غير كدا هما مبلطين فيها .. وماشيين بسياسة "الكلاب تعوى والقافلة تسير" ..
لا والاسخم ان معاوية قال لهم:
انى اعرف ان هذه الخلعة ستصل الى المحتاجين حيث سيتصدق بها ابو ذر ..
علشان هو انسان نقى ونظيف !!!!!
بجد لا تعليق ...

نكت نت .. من حقك تضحك .. ومن حقك لأ


تابعوا الموضوع دا ياجماعة هاحط فيه كل النكت اللى بتجيلى اوف لاين وهاحدثه كل لما يجيلى نكت جديدة ...

مرة محامى خنفس دخل للقاضى..هاى يا قاضى..شوفت ميمى وهو بيقتل.؟ القاضى قالة لا...الخنفس:كوبة يلا ياميمى

مرة واحد اشترى خروف قبل شهرين من العيد وكان بياكل معاه و يستحم معاه ويعمل معاه كل حاجة ويوم العيد الناس كلها زبحت خرفنها الى هو ما لقاش الخروف دور عليه فلقاه عند السطوح بعيط قلو مالك بتعيط فقلو الخروف الناس كلها اشترت خروف الا احنا

قرد ودانه مقطوعة بص فى المرايا و قال يا خسارة الحلو مايكملش


واحد هو وابنة مش عارفين ايه هو الاسنسير , كل شوية يشوفوا الحيطة بتفتح و بتقفل ,المهم شافوا ست عجوزرة دخلت جواه وداست على الزر وطلعت بعد شوية نزل الاسنسير واتفتح خرجت منة شابة جميلة ..فقال لابنه :روح هات امك هنا

صياد اصطاد سمكه فراح بيها لمراته وقالها اقليهالنا قالت مينفعش اصل الزيت غلي........ قالها طيب اشويهالنا قالت مينفعش اصل الردة غليت...............قالها طب اعمليها في الصلصه قالت مينفش اصل الطماطم بقت بخمسه جنيه.......الصياد اخد السمكه ورماها تاني في البحر. طلعت السمكه وهي بتقول " تحيا جمهورية مصر العربيه "....... جريدة الدستور


واحد من جماعتنا الفقراء وجد خاتم سليمان دعك الخاتم طلع له الخادم شبيك لبيك انا بين ايديك اطلب تجاب قال عيز بجنيه عيش قال العفريت يابن الايه خرجتني من الطابور!!

الاثنين، 25 فبراير 2008

it`s time


انا بكره حسنى مبارك وبقولها لو اتسال .. واكيد هاموت قتيلة او اخش المعتقل واييييييه..
انا بكره حسنى مبارك وبحب عم انور بتاع البليلة !
رساله من احمد فؤاد نجم الى الرئيس مبارك :
سيدي الرئيس في عيد ميلادك الكام وسبعين
كل سنة وأنت طيب
واحنا مش طيبين
كل سنة وأنت حاكم
واحنا محكومين
واحنا مظلومين
واحنا متهانين
ويا ترى يا حبيب الملايين
فاكرنا ولا احنا خلاص منسيين
فاكر المعتقلين
فاكر الجعانين
فاكر المشردين
فاكر اللي ماتو محروقين
فاكر الغرقانين
الله يكون في عونك
- هاتفتكر مين وللا مين
في عيد ميلادك الكام وسبعين
بقول لك كلمتين
الأوله شيلتنا طين
وهل تعلم أن النيل بقى رشاح
والجو أصبح بيئة
والعيشة ولعة
والشرفا قلوبهم عالبلد والعة
وانت عاملهم مذبحة ولا بتاعة القلعة
والاقتصاد سداح
والسرقة بقت كفاح
ومصر متاحة بس للسياح
وعرض البلد بقى مستباح
والتانية ورتنا الويل
دا الخطوة في عهدك بقت ميل
والضحك بقى نواح وعويل
والكوسة عارف الكوسة
ممكن أقولك فيها موواويل
والجامعة بقت يا إما كباريه
أو دار مسنين
والشباب معظمهم من غير خمرة سكرانين
والعلم عز على المتعلمين
والأساتذة بقم دجالين
والقادة بقم طبالين
واديني في الهايف يا حبيب الملايين
والتالتة عارف اليابانيين
زمان في سنة اتنين وخمسين
كان عندنا تروماي وكان عندنا علم ومتعلمين
وثقافة ومثقفين
وأدبا وعلما وفنانين
وكانو اليابانيين
بالنووي لسة مضروبين
وللصدقة مستحقين
دلوقتي إحنا فين وهما فين
هما فوق واحنا في أسفل سافلين
والرابعة أمن البلد بقى تنين
والمحاكم اتملت مظالم
والعدالة بقت كمالة
وكلمة الحق في الزبالة
وأصحابها في الزنازين
والخامسة القطاع العام…. عام
والفساد…. ساد
وفي جتة بلدنا بيرعى
أفتكر لجنابك إيه وللا إيه
وكل ذكرى ليك بدمعةآآآآآآآآه آآآآآآآآه
أنا كنت حالف ميت يمين
أكملهم لك تمنية وسبعين
بس هاكفيهم ورق منين
وكل سنة وأنت
واحنا طيبين
الله يانجممممممم فشيت غللى ربنا يخليك .. وياريت يفهموا البعدا التانيين..!

تحذييييير هاااااام جداااااااا ..النصب بقى عينى عينك !


ياجماعة خللوا بالكم فيه مجموعة شباب هايخبطوا عليكم قريب ماسكين فى ايديهم جراكن وبيقولوا لكم انهم من وزارة الصحة وجايين علشان يرشوا مش عارف ايه فى البلاعات علشان وقاية ضد مرض مش عارف ايه برده ,وعلى حسب حالتكم المادية بقى هايخدوا منكم فلوس وهايدوا لكم وصل ويقلولوا لكم هانعدى عليكم الشهر الجاى طبعا السيناريو دا حصل مع اختى وحصل مع صاحبتى وخدوا من اختى مائة جنيه وكانوا عاوزين ميتين وهما طبعا نصابين ولا من وزارة الصحة ولا حاجة فا ياريت تاخدوا بالكم كويس واللى منهم خبطوا عليكم ياريت تاخدوا بتار اختى وصاحبتى وتطلبوا له البوليس ومتدفعوش ولا مليم ,لانهم لو فعلا من وزارة الصحة مش هايطلبوا كل المبلغ دا ولو كانت فعلا بفلوس يبقى مش كل شقة هايدخلوها هايقولوا سعر جديد !

السبت، 23 فبراير 2008

ازمة النهايات فى السينما المصرية ..

كنت بحضر عرض فيلم " خارج عن القانون" فى نقابة الصحفيين - يعنى ببلاش ..ودا يبينلك سبب استمتاعى بالفيلم !- وبصراحة انا بشكر نقابة الصحفيين على المهرجان الاكتر من رائع ده , لانه بيخلينا نتفرج على كل الافلام الجديدة من غير ماندفع لا مليم - اصل الاسعار بقت نار وحتى السينمات غليت! - المهم .. فى ندوة الفيلم استضافوا الصحفى والسينارسيت بلال فضل .. ولانى كنت العنصر النسائى الشبابى الوحيد اللى رفع ايده فاطبعا سمحولى اتكلم .. بصراحة انا عجبنى الفيلم وكنت مشدودة من اول لقطة وعجبتنى التقنيات - وقلت والله عمار يامصر - لكن بصراحة اول ما بدأ كريم يواجه جيش من الشرطة بعربية نص نقل ويقدر يهرب من كل المواجهات دى قولت ايه -بدأنا !- واتأكد احساسى بأن النهاية هاتبقى تقليدية وسخيفة, وفعلا المشهد الاخير الصراحة اثار سخطى على الفيلم كله - ودا اللى قلته لبلال - ببساطة كريم فى اخر مشهد لعب دور البطل الذى لايقهر وموت جيش برده - بس المرة دى من رجالة السويسى رجل المخدرات اللى كان بيأويه واكتشف قتله لابوه - لا مش بس كدة هو كان متحصن فى بيت حبيبته, والسويسى ورجالته تحت يعنى كريم فوق والشريرين تحت ,يعنى كريم فى مركز قوة ودا يمكن يبرر شوية انه قدر يقضى على كل الرجالة دى.. لكن اللى مش مبرر بقى ,انه ينزل من مكانه اللى هو -فوق- علشان يتكلم مع السويسى !!! ويقولوا كلام مطاط ولم يضف اى جديد ,علشان السويسى يقوم ضارب كريم فى كتفه - علشان هو وحش برده مش شريف.. مهو مهما كان تاجر مخدرات برده - علشان بلال من وجهة نظره ان كريم برده كان لازم يتعاقب ! وعلشان كريم يموت السويسى بطلقة فى دماغه ! ياااااه بجد حسيت وانا خارجة من الفيلم انى بقول فى سرى .." ليه بس كدا يابلال .. يعنى تفضل طول الفيلم ماشى كويس ..تتزنق فى قفلة سخنة تقوم عامل قفلة هبلة ؟؟؟! " ..
نهاية الفيلم دا اثارت جوايا رؤية شاملة لاغلب نهايات الافلام المصرية من اول رصيف نمرة خمسة, واغلى من عينيا لفاتن حمامة ولحد فيلم ابو على وخارج عن القانون وغيرها كتير , وعلى فكرة الموضوع دا مش بيتأثر بحجم الانتاج يعنى ممكن فيلم يكون مصروف عليه كويس اوى وكل احداثه كويسة ويجي الكاتب ميعرفش يحل الحبكة اللى بيحبكها فايلجأ لمعالجات غريبة اغلبها يتلخص فى اما موت البطل او البطلة او وصول الشرطة فجأة وبدون سابق انذار - وتسأل نفسك ساعتها هو مين اللى طلب الشرطة؟! فا متلاقيش اجابة فا تسال اللى حواليك يقولولك شششششش اتفرج وانت ساكت .. ودا علشان هما كمان مش فاهمين مش اكتر! - , او البطل هركليز اللى بيضرب عشرة بضربة واحدة .. وبعدها البطل والبطلة يتجوزوا ويعيشوا فى تبات ونبات - ولا عزاء للمشاهدين المساكين - !

موضوع النهايات دا هو اللى بيفرق السينما العربية عن السينما الاجنبية لان الناس دى بتحترم عقل المشاهد وتفكيره , بغض النظر عن الامكانيات ..لان ممكن فكرة حلوة اوى تتنفذ ومش شرط الامكانيات - هى طبعا مهمة - لكن احنا احيانا ممكن نغفر لفكرة متنفذة حلو وتصاعدها الدرامى كويس وحل الازمة جامد, لكن انتاجها ضعيف ونقول يااه لو الفكرة دى كان اتصرف عليها كانت هاتبقى طلقة, لكن مابالك بفيلم بيتصرف عليه قد كدا وتخرج منه تقول - ايه النهاية الخايبة دى ؟! _ منكرش ان فيه افلام مصرية كتير اعتمدت على نهايات قوية زى تيتو واللى مخضعش لمعايير السوق اللى بتقول ان لازم المشاهد يطلع سعيد , وكمان ويجا اللى اعتمد على النهاية المفتوحة وغيرها افلام كتير احترمت عقل المشاهد وممشيتش مع الهوجة.. لكن برده فيه افلام كتيرة ودا الاغلب نهايتها مجرد - ضحك على الدقون - , ياترى هل دا استخفاف بعقول المشاهدين واعتقاد فى سذاجتهم ؟ولا لان الكتاب دول بيبقوا بيكتبوا علشان سبوبة ؟ولا علشان عارفين ان الشباب داخل يفنفن مش اكتر ؟ ولا هو قصور ابداع ؟ ولا ايه .. فكروا معايا ..

الجمعة، 22 فبراير 2008

الغضب الساطع ..

الخميس، 21 فبراير 2008

بركاتك يا امارات !!



تانى هانتكلم على المنتخب .. بس المرة دى مش علشان نهلل لفوزه ولا نبارك الانجاز العظيم .. انا هاحط ايديا على نقطتين _من وجهة نظرى _ فى غاية الاهمية .. والحاجتين دول لاحظتهم بعد انتهاء البطولة الافريقية ..

اول حاجة لفتت انتباهى .. كم عروض الاحتراف اللى جت للعيبة المنتخب _ وكأنهم مكانوش شايفنهم قبل البطولة !_ زى ابو تريكة والحضرى وغيرهم كتير .. طيب هو لما دول يمشوا .. المنتخب هايفضل فيه مين ؟! خاصة وان احنا داخلين على تصفيات كاس العالم ومحتاجين كل لاعب علشان نقدر حتى نتأهل ليه ..والموضوع دا مسئولية مين .. انا صراحة مش عارفة ..

تانى حاجة وهى الاهم .. بعد رجوع المنتخب ,كل المهتمين بالكورة - وحتى اللى مش مهتمين - راحوا علشان يستقبلوا المنتخب فى المطار ويفرحوا بيه (ودا على اساس ان المنتخب هايخرج فى اتوبيس مكشوف علشان يحيي جمهوره ) راح الجمهور ملقاش المنتخب !

خرج من المطار سرا .. المدهش بقى اننا سمعنا تانى يوم فى كل الجرايد والتليفزيونات ان منتخبنا العزيز" راح ".. وخدوا بالكم من كلمة راح دى .. راح دبى علشان يتكرم فى استاد دبى قبل مايتكرم فى بلده مصر فى استاد القاهرة .. ودا بحجة ايه ؟ علشان يفرحوا الجالية المصرية هناك ..طيب هما يفرحوا الف ولا الفين ولا الاولى يفرحوا 80 مليون الاول ؟!

وكمان هو لو حد عاوز يجيب هدية لحد يقوله تعالى لى لما اديهالك ولا يجيبهالو فى بلده ؟ او على راى واحد صعيدى فى العاشرة مساء :

" هو العريس بيروح لقرايبه علشان يلم النقطة ؟! " .. الامارات كلها على عينا وعلى راسنا و صحيح حاكم دبى راجل بيحب مصر لكن برده المنظر مكنش لطيف .. قالوا انهم برده كرموا العراق بعد حصولها على بطولة اسيا .. ماشى بس دا لان ظروفهم الامنية متسمحش انهم يتكرموا فى بلدهم .. لكن مصر بلد حر ومش محتل .

والاكثر ادهاشا بقى هو " العلب" اللى خدوها اللعيبة وشكلهم وهما بيدوروا فى الملعب بيها .. بصراحة منظر مستفز .. زى مانكون فرحانين بالعطية ! واللى يغيظك اكتر بقى .. ان مجلس الادراة بالكامل اخد هدايا _ خصوصا ان احد اعضاء مجلس الادراة عضو فى مجلس الشعب _ دا غير الصحفيين والجهاز الفنى ورئاسة الاتحاد واعضاؤه .. يلا ماهى هيصة ! ...لا وايه _ الجنازة حارة والميت كلب _ قصدى والهدية " ساعة " قال يعنى اللعيبة محتاجة ساعات _ دول على قلبهم قد كدا _ ! برده مننساش نذكر انه تم تاجيل الدورى المصرى لحين الانتهاء من الزيارة وان الرئيس مبارك كان " بالصدفة" فى زيارة للامارات فقال يسلم عليهم هناك _ لا تعليق ! _


وانا بتفرج على الموضوع دا نط فى دماغى على طول المنحة اللى اداها حاكم الشارقة _ الامارات برده _ لاتحاد الكُتاب " علشان علاج الكُتاب " وبجد حسيت بالاهانة .. طيب انت بتحب مصر اوى وعاوز تساعد اتحاد الكُتاب قدم المنحة ومش لازم تقول هى لأيه .. والاتحاد ياخد الفلوس يوجهها زى ماهو عاوز .. لكن مش تقول دى للعلاج وكأن مصر مش قادرة تصرف على كُتابها ؟! وبصراحة احترمت منطق "صافيناز كاظم " الصحفية المشاغبة لما قالت, ان احنا ككُتاب وصحفيين لينا حرية ننتقد كل اللى احنا شايفين انه مخطئ سواء محليا او عربيا ,ولو جينا فى يوم وانتقدنا حاكم الشارقة او اى تصرف فى دولة الاماراات هاتبدأ نبرة المعايرة حتى لو مجتش منهم هاتيجى من اى حد هايقولولنا " اختشوا على دمكم مش هما دول اللى صرفوا على علاجكم .. بتعضوا الايد اللى اتمدت لكم ؟!"وبصراحة هايكون ليهم حق يبقى ليه محمد سلماوى " رئيس الاتحاد " يحطنا فى موقف زى دا ؟! ..

طيب قالوا ان حاكم الشارقة اتعلم فى كلية الزراعة المصرية وان مصر ليها جمايل عليه .. طيب وحاكم دبى ؟!
هى ايه حكاية الامارات بالظبط ؟ هاتصرف علينا كمان .. بعد كدا هاناخد مصروفنا منها ؟!

وكل اما نقول مصر مش محتاجة حاجة من حد يقولوا دى مصر زماااااان كانت بتعلم الدول العربية كلهم ! وكانت بتوردلهم مساطر وكشاكيل واقلام .. يعنى هى مصر لما كانت غنية كانت بتصرف عليهم ولما افتقرنا الامارات حست انها لازم ترد الجميل وتتكفل بكُتابنا ولاعبينا وتصرف عليهم ؟!

والادهى بقى ان الموضوع مطلعش جديد وان مش بس اللعيبة هما اللى بياخدوا هدايا دا حتى الوزرا و اعضاء مجلس الشعب بياخدوا هدايا ومش مدركين لحساسية دورهم فى البلد .. واوضح مثال ساعة " وزير الاعلام المبجل انس الفقى " واللى قالوا انها بحوالى 990 الف جنيه يعنى قربت على المليون وقالوا كمان انها منحة من حاكم عربى ! لما الوزرا بياخدوا هدايا يبقى الصحفيين واعضاء اتحاد الكورة ليهم حق!!
انا كمصرية بعلن شعورى بالاهانة للتصرفات دى .. يظهر ان مبارك كبر وخرف ومش مدرك للاوضاع اللى بيحط مصر فيها ..والبلد فعلا بقى حاميها حراميها .. حسبى الله ونعم الوكيل ..

بشرى يا مسلمين ..


بدأ بث قناة الأمة الفضائية على النايل سات – عمودي – تردد 10911 أو 10917 أول قناة إسلامية متخصصة في الدفاع عن رسول الله الرجاء .. أنشرها حبا في رسول الله صلى الله عليه وسلم..

الأربعاء، 20 فبراير 2008

بيوقعونا فى بعض !

زمان لما كنا بتفرج على نشرات الاخبار ونشوف احداث الاعتداءات الاسرائيلية المستمرة على فلسطين , ونشوف الشهداء الفلسطينيين كنا بنتأثر اوى ,وتانى يوم تطلع مظاهرات فى كل انحاء مصر تندد بالاحتلال وتطالب بتوحيد العرب للدفاع عن فلسطين ...
لكن دلوقتى مش عارفة حاسة ان الناس مبقتش بتفرق معاهم .. يحاصروا غزة .. عادى وايه يعنى .. يعملوا مجازر.. حاجة بنسمعها كل يوم ومبقتش جديدة .. يقتلوا الاطفال .. ياحرااااام ونتصعب واحنا بنسمع الخبر وكان الله بالسر عليم .. يمكن دا لاننا بقينا بنتعامل مع الموقف من برة ..وكأن اسرائيل بتضرب فى ناس غريبة عننا وكأن عمر ما مصر وغيرها من الدول العربية ماهاتضر من الممارسات دى .. لكن لأ احنا واهمين لان اى اعتداء على دولة فى المنطقة وعدم الدفاع عنها ..بيتيح الفرصة للدول الاستعمارية اننا كلنا _ اقصد كل الدول العربية _ يبقوا هدف سهل.. والدليل انهم بدأوا بفلسطين .. محدش اتكلم ..فاحتلوا لبنان ..و محدش اتكلم .. فاحتلوا افغانستان .. واحنا فى التراوة .. العراق .. ولا الهوا .. لحد مابداوا يهددوا سوريا وايران .. وبرده محدش اتحرك ..
لكن فعلا بدأنا نحس بالخطر لما الموضوع مسنا اوى _ اقصد مصر يعنى _ واحنا دايما كدا منتحركش الا لما تحصل الكارثة .. فا بعد الاجتياح الاسرائيلى الاخير لقطاع غزة ومنع الوقود والكهربا ومنع الموارد الغذائية والدوا كمان عن الشعب الفلسطينى دا غير العمليات العسكرية المنتظمة اللى بتقتل بالعشرات يوميا ومبيهمهاش ان كان شاب او طفل او عجوز .. حاولت مصر تقف جنب الشعب الفلسطينى فافتحت معبر رفح اللى على الحدود بين مصر وفلسطين .. وكان الهدف اننا نساعد الشعب الفلسطينى على انه يشترى احتياجاته من اكل ودوا ويرجع, ودا لمواجهة الحصار ..لكن اللى حصل كان محزن .. لما الفلسطينيين لقوا مقاومة من قوات الامن المصرى علشان ميفتحوش الحدود استخدم الفلسطينيين القوة وحصلت مواجهات ,ولما الرئيس مبارك سمح بدخولهم اتخلقت ازمة كبيرة .. فا اسرائيل احب ماعندها انها تخرج الفلسطنيين من غزة علشان يتوسعوا هما فيها .. طيب والفلسطنيين يروحوا فين ؟ مصر اولى بيهم .. يبقوا لاجئين فى سينا لحد مايستوطنوا فيها ويخلى الجو لاسرائيل وعلى فكرة الهدف دا مش جديد ,المخطط دا موجود من ايام بن جوريون رئيس وزراء اسرائيل عام 1948 ..وهما لعبوها صح ورموا الكورة فى ملعب مصر ,
و يبقى الموقف كالاتى :لما مصر ترفض تدخل الفلسطينيين علشان احترام سيادة اراضيها ,تبقى مصر وحشة ومش بتساعد جيرانها ..لا وبتساهم كمان فى تجويعهم .. ولما مصر تدخلهم ,يستوطنوا فى سينا وتبقى بلدهم ودا هدف اسرائيل ,وعلشان كدا اسرائيل مش هاتسكت وهاتفضل تضغط على غزة واكيد القيادة المصرية عارفة الموضوع دا كويس ومع ذلك دخلت الفلسطينيين لا واتقتل اتنين من جنودنا كمان اثناء المواجهات .. طيب ليه احنا مدخلناش الامدادات اللى هما عاوزينها ليهم ؟ ودا حصل كتير قبل كدا وكل الشعب اتبرع دا غير المؤسسات والهيئات .. ليه نخلق كل المشكلة دى ؟
وحتى مش عارفين نزود جنودنا اللى على الحدود عن 750 جندى لان دا بينص عليه اتفاقية كامب ديفيد المشئومة يعنى لو اتكرر الوضع اللى احنا فيه دا تانى .. مصر مش هاتقدر تواجه ..
ياريت قيادتنا تفهم المؤامرات دى وتصحى لها اوى لاننا بنتعامل مع عدو زكى جدا وفاهمنا اكتر ما احنا فاهمين نفسنا وبيحاول يوقعنا فى بعض بكل الطرق واحنا بنديله الفرصة دى بسذاجتنا وتغليبنا للعواطف من غير عقل ولا حكمة ..
دا طرح بسيط للموضوع من وجهة نظرى وعاوزة اسمع رايكم ..