ضحكة بنت اختى !

" سالت نفسى كتير مرستش يوم على بر ..
انا اللى فيا الخير ولا اللى فيا الشر ..
ولا انا جوايا ومش دارى الاتنين فى بعض؟!"


لأ..الانسان بيتولد بالخير والخير وبس .. من ايام ادم .. ادم اتخلق فيه الخير وعاش فى الجنة وخرج منها وهو لسة فيه الخير .. وبدأ ابناء ادم اول لما نزلوا على الارض يتعلموا الحقد والغيرة .. وقتل قابيل هابيل .." يتعلموا " يعنى الشر مش صفة فطرية فى الانسان .. الانسان الخير متأصل جواه والشر دا شئ مكتسب وكذلك المصلحة وحب النفس ..
فكرت فى الحاجات دى كلها وانا بتابع بنت اختى من اول ما اتولدت ولاحظت ان اول حاجة اتعلمتها كصفة مكتسبة هى الضحك .. وبقت بتوزع ضحكها على كل الناس ومبتبخلش على حد .. من اول ماتفتح عينيها ولحد ماتنام .. دا غير الصفة الفطرية واللى هى العياط .. يعنى لما تكون مبسوطة .. تضحك .. تعبانة او متضايقة .. تعيط .. صفات بسيطة جدا حسستنى اد ايه الانسان دا طيب ..
احنا اول ما بنتولد بنبقى عاملين زى حتة السفنج بنمتص كل التصرفات والافعال .. الحلو منها والوحش .. بنتولد واحنا صفحة بيضا كل الافعال اللى فيها نقية : الضحك والعياط واللعب.. بنحب كل حاجة ..وبنستكشف كل حاجة .. بنتولد بالصفات الحلوة بس وكل الصفات الوحشة بنكتسبها .. والشاطر بقى هو اللى يعرف يحافظ على صفاته الحلوة من الدنيا واللى بتعمله فى الواحد ..
ولاحظت حاجة كمان ان بشرى بتحس بالناس اوى .. ودى حاجة فطرية بتتخلق جوة الانسان .. بتحس باللى بيحبها وباللى بيعاملها وحش وتضحك لدا وتعيط مع دا ..
لكن فى العموم بشرى على طول بتضحك " ماشاء الله يعنى " حتى لما تتخبط او تقع بتضحك .. الكائن دا اللى عنده 8 شهور علمنى يعنى ايه تفاؤل .. بكون راجعة من الكلية شايلة هموم الدنيا كلها ومكتئبة وحتى مش قادرة اضحك .. اول ماادخل والاقيها عندنا .. تضحك لى ضحكة من الضرفة للضرفة .. مبقدرش اقاوم انى اضحك, واضحك من قلبى كمان وانسى كل هموم الدنيا .. ولما بتابع حركاتها وتصرفاتها بقعد اضحك اضحك اوى على الفطرية والطبيعية اللى بتتصرف بيها .. يعنى احساسها الطبيعى بالسعادة واللى بيخليها احيانا ترفص من كتر السعادة لما ازارتغير لها و تخليها سلبوتة "زى ماخلقها ربنا " ,بالرغم من ان التصرف دا ممكن يكون واحنا فى عز الشتا ..وتعيط وترفص برده من الزعل وهى بتلبس !! كمان احساسها الفطرى بانها عاوزة تستكشف كل حاجة بانها تحطها فى بقها .. اى حاجة ..صلبة سايلة سخنة بارده ..مش بتفرق معاها , المهم تدخل معمل الفحص "بقها " .. ولا لما حطت ايدها على الخلاط وحست بيه وهو بيتهز واتخضت اوى ودخلت فى حضن مامتها .. كل الحاجات دى حسستنى قد ايه ان الانسان بطبعه فطرى وطيب ,وان كل سلوكياته مهما كانت صغيرة بتبقى مكتسبة ,وان الفطرة فى الانسان الخير.. فاياريت بجد كلنا نقدر نحافظ على الخير الفطرى اللى جوانا .. ونبعد عن كل السلوكيات الوحشة اللى علمتها لنا الحياة ..لو كلنا وصلنا لده هانعيش حياة احلى .. هانحب من قلوبنا.. ونضحك من قلوبنا زى ضحكة طفل صغير عنده 8 شهور لسة الدنيا مقسيتش عليه ..
بس عارفين ؟ احلى حاجة عملتها بوشى فى حياتنا انها خلت بابا وماما - بعد مابقوا تيتة وجدو - انهم بقوا متمسكين بالحياة اكتر وبيحبوها اكتر .. حتى بابا بيقول ان محدش هايودى بوشى اول يوم الحضانة غيره ان شاء الله , دا غير انها خرجت الطفل الشقى من جوا بابا وخرجت كمية الحنية والحب اللى جوا ماما واللى مش بتعرف تعبر عنها بجد الا وهى شايلة بشرى وبس - بركاتك يابوشى ياجامد -
علشان كدا انا بحب بوشى وبحب ضحكة بوشى ويارب تفضل منورة حياتنا وملياها ضحك ولعب وحب ..
ها ..؟ عاوز تشوف احلى واروق واصفى ضحكة ؟....
"ضحكة بنت اختى "

" مين فى الحياة دى متولدش برئ مبنختلفش عن الملايكة فى شئ ..

والله يسامحها الدنيا بتغير .. واتارى البراءة عمرها قصير "