الحياة حلوة ... بس احنا اللى عاملين ريجيم !

عارفين يعنى ايه ريجيم من وجهة نظرى ؟ ..
يعنى انك تمتنع بمزاجك او غصب عنك عن حاجة انت بتحبها .. وتفضل الحاجة دى تظهرلك فى كل حتة وتفضل تحنسك .. تحنسك .. لحد ما تستسلم لها او تموت نفسك علشان تبعد عنها .. او تعمل فيها تلات رجالة فى بعض وتقدر فعلا تغمض عينك عنها وهى مالية عينيك !!
انا فعلا عاملة ريجيم .. مش بس ريجيم عن الاكل .. لا وكمان ريجيم عن الشغل .. وريجيم عن الخروج .. مع انى بحب الاكل .. وبعشق الشغل .. وبموت فى الخروج !!

(بس انا مش تخينة اوى يعنى لا مخكوا يروح لبعيد.. انا بس عاوزة ابقى سمبتيك !!)

بس ريجيم الاكل انا عارفة سببه .. لكن ريجيم الشغل والخروج .. حاسة انها حاجة كدا بالاكراه !!

يمكن لان الايام بقت شبه بعضها اوى .. مفيش جديد.. أو مفيش حدث فارق الواحد ممكن يبدأ من عنده اويعلم فى دماغه ..

بجد مبقتش عارفة .. هى الحياة وحشة واحنا اللى حلوين .. ولا الحياة حلوة واحنا اللى بقينا وحشين ؟!

ولا هى الحياة وحشة واحنا كمان وحشين .. ولا يكون الحياة اصلا حلوة واحنا بقى لما وحشنا وحشناها وخليناها هى كمان وحشة ؟!

وياترى هى اللى علمتنا نبقى وحشين .. ولا احنا اللى علمناها متبقاش حلوة ؟!

هى الناس اللى ماشية تكلم نفسها فى الشارع دى من الغلا والقهر .. ومش عارفين يعيشوا حياة حلوة .. عاملين ريجيم عن الحياة ولا مجبرين ؟!..

انا حاسة انى كبرت اوى .. مع انى لسة صغيرة اوى .. نفسى اعيش الحياة الحلوة .. وطظ فى الريجيم ..

نفسى الناس كلها يعيشوا الحياة الحلوة .. نفسى نعرف ان لما الكبير يدى -بزمة وضمير- زى الصغير.. الخير هايغرقنا كلنا ونقدر نعيش الحياة الحلوة ..

ياجماعة والله الحياة حلوة ..

اينعم مش بنلاقى اكل ولا لبس ولا مواصلات ولا تعليم ولا شغل ولا علاج ..

والحضارة منعدمة والتقدم غايب

بس صدقونى صدقونى ..

الحياة حلوة ..

احنا مش بعد كل الحاجات اللى مش بنلاقيها دى .. بنخرج نفس وبندخل نفس .. ولسة بنقدر نضحك ونلعب ونتريق .. ونعمل مقالب فى بعض كمان !!

يبقى لازم تبقى الحياة حلوة ..

عايشينها بالبركة ؟!

وماله ..ربنا ان شاء الله يبارك فى البركة ..وتبقى حركة .. ونتحرك معاها ..

ويمكن ساعتها نفك الريجيم - اللى احنا عاملينه بمزاجنا - وبأكد : بمزاااااجنا !!

ونشوف الحياة على حقيقيتها .. ويمكن نقدر نعيشها كمان

مش بعيد والله ..

الريجيم علمنى ابقى متفائلة .. واترفع عن كل احتياجاتى .. وعلمنى الامل فى بكرة .. مش انا لما افك الريجيم - هارجع تانى اكل اللى انا عاوزاه ؟!.. بس ساعتها هاظبط اكلى علشان مرجعش للريجيم الوحش دا تانى -

الريجيم قاسى .. ومتعب وبيدوخ .. لكن لما بتخيل نتايجه.. بتمسك بمتاعبه وبحبها ..وبتهون اوى عليا

يارب يكون اللى احنا فيه دا مجرد فترة ريجيم قاسية .. بنعملها علشان السمنة الحضارية اللى وصلنالها .. هانتعلم منها و هايتظبط بعدها وزننا ..ونرجع ناكل اللى احنا عاوزينه تانى ..

لكن ساعتها ياريت نظبط اكلنا علشان منتخنش .. منتخنش على الفاضى زى البالونة .. على قلة فايدة.. زى حالنا دلوقتى !!

بيقولوا الحب ...

" بيقولوا الحب بيقتل الوقت .. وبيقولوا الوقت بيقتل الحب

ياحبيبي تعا تنروح قبل الوقت وقبل الحب

بديت القصة تحت الشتى .. بأول شتى حبوا بعضن

وخلصت القصة بتانى شتى .. تحت الشتى تركوا بعضن

حبوا بعضن .. تركوا بعضن

ياحبيبى شو نفع البكى .. شو الوا معنى بعد الحكى

مازالا قصص كبيرة ..

وليالى سهر وغيرة

بتخلص بكلمة صغيرة

حبوا بعضن .. تركوا بعضن "

طبعا كلنا سمعنا الاغنية العظيمة دى لفيروز .. الاغنية دى بتجسد معانى الحب عند كتير من الشباب دلوقتى .. يعنى الاغنية دى سابقة عصرها بجد .. فعلا الحب بالنسبة لمعظم الشباب دلوقتى بقى مجرد قتل للوقت .. تسلية .. وقت فاضى مش عارفين يعملوا فيه ايهوفعلا برده الوقت بيقتل الحب - وخاصة بعد الجواز - ومش بس الوقت .. الوقت والظروف المادية والاقتصادية والروتين ,

وكمان اغلب القصص دلوقتى لو قعدت من الشتا للشتا دا يبقى انجاز عظيم لانها فى الاغلب مبتكملش موسم واحد يعنى لو بدات فى اول الصيف - عن طريق مصيف ولا غيره - تخلص طبعا مع نهاية الاجازة ولو بدأت فى الشتا - فى جامعه ولا بتاع - تخلص مع نهاية العام الدراسى .. اما بقى فى الربيع الحياة بتبقى وردى شوية بس القصص بتنتهى برده .. والخريف كلنا عارفين - محدش بيبقى طايق نفسه - يعنى يافيروز ياحبيبتى احمدى ربنا ان اللى بتتكلمى عنهم حبوا بعض باول شتى وسابوا بعض فى تانى شتى .. وفعلا ساعتها وفى الحالات دى البكا مبينفعش لان الموضوع بيبقى انتهى خلاص وكل ليالى السهر والقصص اللى بتحصل دى بتنتهى طبعا لانها بتبقى وهم .. وهم بالحب والسهر والغيرة.. بتخلص بسهولةةةة بكلمة صغيرة اوى زى شكة الدبوس .. ويبقوا حبوا بعض .. وسابوا بعض ويرجعوا يحبوا تانى ويسيبوا تانى ويحبوا تانى ويسيبوا تانى .....

على كل لون يا بطيستا !!

ربنا قدر عليا اركب المترو من ايام ما كان بخمسين قرش .. من ايام ماكانت الشركة الفرنسية هى اللى ماسكاه ..

وبصراحة الشركة الفرنسية كانت مخلياه زى الساعه .. كان وقتها كل مترو كان بيجى كل خمس دقايق بجد... تحسب وقتك عليه .. مفيش حاجة اسمها يتعطل .. كنت توصل الميعاد بتاعك وانت مبدر خمس عشر دقايق كمان .. وكان بصراحة مواصلة ادمية يمكن اكتر من الميكروباصات والاتوبيسات .. مكان نضيف وجميل .. كنت بحبه اكتر من بيتنا .. ياااااه كانت ايام..

ولما دخلت ثانوى بقى كانت خلاص الشركة المصرية مسكته .. وما ادراكم بقى بالشركة المصرية!! ..

كنا بندخل المترو نقلبه قعده عرب ..نقعد ناكل ونغنى.. ونتخانق طبعا - لانى كنت بركب عربية السيئات قصدى السيدات فا مبتخلاش طبعا من الخناقات -وكنا بنعمل كل حاجة ..حتى المزاكرة لاننا كنا بنقعد وقت طويل اوى فى المترو رايح جاى رايح جاى ..

ولما دخلت الجامعة بقى بدات الاحظ حاجات غريبة اوى فى المترو .. لاحظت ان المترو مش بس بقى مجال للخناقات والحوارات والمناقشات السياسية والاجتماعية وحتى طريقة عمل المحشى بالبشاميل .. لأ دا كمان بقى اشبه بالسوق من بعد مانتشر البياعين اللى بيبيعوا كل حاجة .. كل حاجة بمعنى الكلمة .. يعنى لو قاعد وغمضت عينك وفكرت تشترى اى حاجة .. هاتفتح تلاقى بياع بيحطها على حجرك ..
دانا مرة راكبة المترو فى عربية الرجالة .. دخل عيل صغير بيبيع مرايات حريمى - من اللى بتتحط فى شنط البنات .. وقعد ينادى : ايوة المرايات.. اتفرجى يامدام .. المرايات ام اتنين ونص بعنها بجنيه وبس .. ايوة المرايات ..

وفجأة بيبص حواليه لقى كل اللى قاعدين رجالة ..!
استدرك بسرعة الموضوع وبدا يغير الندا وقال :

ايوة المرايات .. اتفرج على المرايات ياباشا مرايات لجمال بناتك.. بجنيه واحد وبس! طبعا امال يبيع ازاى .. الرزق يحب الخفية ولا ايه ؟!

وبدا البياعين يتحولوا من بيع الخمارات والاسدالات وادوات الميكب والشرابات لبيع الاغذية المجمدة والخضار المتقشر والبهارات علشان راحة الست اللى بتشتغل طبعا ..
ومين عارف بكرة هانلاقيهم بيبيعوا ايه تانى ؟!
ومع التطور الطبيعى لحالة الفساد اللى فى المترو، بدأ يظهر مش بس بياعين.. لأ وشحاتين كمان .. ودول بقى من كل نوع .. شحاتين بالشحتفة وشحاتين بالبلطجة .. دا غير موضوع الورق المطبوع اللى بيبقى مكتوب فيه .. انا اسمى وحيد و اعول اسرتى ووالدى متوفى .. وعلى فكرة كلهم اسمهم وحيد .!. دا حتى مرة بنت وزعت ورق مكتوب فيه انا اسمى وحيد برده ..
والوشوش بتاعتهم بتتكرر وكلامهم بيتكرر وكأنهم فاكرين اننا بنشوفهم لاول مرة .. يعنى مرة كنت قاعده فى المترو برده ودخل راجل كبير شفته كتير اوى كاشف رجله عن جرح كبير او حرق ..وقعد يحلف بصوت عالى : وربنا انا مش شحات .. اقسم بالله انا مش شحات .. وقعد يستخدم كل اساليب الشحاتة.. يعنى طلع فى الاخر ..شحات !!
وطبعا بلاش نسال فين شرطة المترو لانهم مبيظهروش الا لما يكون حد غلبان زى حالاتى كدا ضيع تذكرته غصب عنه واتقفش عند المكن وبيتعمله محضر ويتبهدل قال ايه علشان سرق البلد فى جنيه !!
وتذكرة المترو ركبت موضة الغلا هى كمان ووصلت من نص جنيه لجنيه .. سواء رايح محطة او عشرين هى برده بجنيه .. والاشتراكات كمان غليت .. على خيبة ايه.. معرفش؟!
دا حتى ياربى لما فكرت شركات الاعلان ترفه عننا و تعمل موسيقى تتسمع فى المترو علشان تهدى الركاب ..اعتبروها الناس صداع و تطرف و ضد الدين !!
ومن الحاجت اللى لاحظتها برده موضوع عربية السواق اللى بقت ميكروباص بقى عادى انك تلقى اتنين تلاتة راكبين مع السواق .. اتنين تلاته معارف للسواق او مش معارف متفرقش .. دانا حتى بيتهيألى انهم هايرموا السواق ويفضلوا هما .. ومش مقدرين خطورة اللى بيعملوه دا .. وكمان السواق مش مقدر اهمية شغله لانه ببساطة لو انشغل لحظة عن الطريق برغيه مع اللى معاه فى العربية ممكن يتسبب فى كارثة يروح فيها الاف من اللى بيتكدسوا فى المترو كل يوم ..
اخر موضة فى المترو بقى هو نقل عربية السيدات ..
نزلت مرة اركب المترو كالمعتاد ..لقيت علامات حمرا فى الارض مكتوب عليها سيدات .. قلت دا تعسف .. حاطين اسمنا فى الارض علشان الرجالة يدوسوا عليه .. طبعا ماهى عنصرية ؟!!!!!
وبعد شوية عرفت الخبر اليقين : الستات كانوا بيتخانقوا مع بعض قاموا دوشوا السواق وصدعوه وجابولوا تربنة وخلوه يلبس فى الرصيف ..فاقالوا احسن ينقلوا عربيات الستات فى نص القطر علشان لما تحصل حادثة ..الرجالة بس هما اللى يتعجنوا على الطرفين والستات يطلعوا سلام فى النص ..
وبأمر آمر اتنقلت العربيات .. وعلشان الشركة المصرية اللى ماسكة المترو .. وعشان ثقافة المصريين مبتقبلش التغيير .. بقت الرجالة بتركب عربية السيدات عينى عينك وقدام عساكر المترو كمان وكأنهم ماصدقوا ..بالرغم من اليافطة اللى تسد عين الشمس بتاعت " مخصص للسيدات فقط "
ولما تكلم اى راجل يقولك : ماهى الساعه عدت تسعه .. حتى لو الساعه 11 الصبح !!
لكن المترو دا بصراحة كان جامد اوى فى حوار واحد .. فاكرين اضراب ابريل .. المتروبقى .. كان المحرك الشعبى للاضراب دا .. كل الناس اللى كانت بتركب المترو عرفوا موضوع الاضراب من خلال المترو .. وكانت بتقام حلقات نقاشية سياسية كامله على الموضوع دا وحصلت قدام عينى والله .. وكانت هاتتحول لمظاهرة شعبية ضد الغلاء كمان!!
يلا ربنا يخليلنا المترو يارب ويطرح فيه البركة .. و ينضف شوية يارب وميتأخرش وميتعطلش .. دانا من غيره احتاس والله يارب .. دانا لما عطل العطلة الجامدة دى كنت هاتجنن ومعرفتش اخرج من بيتنا .. هو بالرغم من كل اللى حكيته من اسرع واكتر المواصلات ادمية لحد دلوقتى يعنى .. بس يارب نحافظ على اخر حاجة باقيالنا من مظاهر التحضر .. يارب يارب !!

يا اهل المغنى ....

صحيت من النوم الصبح على اغنية كلماتها ازعجتنى جدا ..واحد بيقول لحبيبته " خللى عندك دم وحسى شوية باللى انا فيه " وفى وسط الاغنية بيقولها " قصرى وهاتيلى من الاخر " وبعد كدا عرفت ان اللى بيغنى الاغنية دى هو رامى عياش .. يعنى هو مش مطرب شعبى ولا بيغنى اغانى هابطة ..

ياخبر .. دا حب ايه دا اللى كأنه فى خناقة .. حد يقول لحبيبته خللى عندك دم ؟!

الاغنية دى خلتنى افكر فى اغانى كتير من النوع دا .. اغانى لمطربين المفروض انهم محترمين وفنهم محترم .. يعنى انا مش هتكلم عن اغانى شعبية هابطة , زى اغانى اللى اسمه زعرور دا ولا بعرور .. ولا اغانى مسفة من امثال "حط النقط على الحروف " لان كلنا عارفين ان الاغانى دى اغانى افراح وميكروباصات ..

انا هاتكلم عن اغانى لمطربين مشهورين والمفروض انهم بيحترموا فنهم لكن للاسف بداوا يستخدموا كلمات ومعانى غريبة فى اغانيهم ..

يعنى مثلا تامر حسنى .. انا بعتبره فنان محترم وحساس اوى لكن سمعتله اغنية بيقول فيها فيما معناه يعنى " مش هارجعلك حتى لو وقفتى على ايديكى " واغنية تانية بيقول فيها " ارجعلك يعنى حرقة دم .. اسمعلك كل كلامك هم " ..

بزمتكم الكلام دا مش بتسمعوه دايما فى الخناقات؟

بهاء سلطان غنى وقال " قوم اقف وانت بتكلمنى " وفى اغنية تانية قال " صدقنى بقى ولا اسال بره "و كانه بياع فى سوق بيبيع شروة قوطة بالظبط !!

دا حتى ياربى محمد فؤاد انتشرت المعانى دى فى اغانيه زى مثلا اغنية " الله هو انا جيت جنبك .. الله هو انا كلمتك " وكأنه بيعاكس واحدة مش بيحبها ! وعندى نماذج كتير من امثال: بجد طلعت اى كلام , وعارفة عليك حاجات كتيرة مش تمام _ وكأنها عرفت انه نصاب او تاجر مخدرات _ ، وكتك ضربة فى قلبك وغيره وغيره ..

بقيت احس ان قاموس الروش طحن كله بتطوراته بيتنقل للاغانى .. وان كلمات الحب كلها تحولت لشتايم وخناقات ..

دا حتى لو كان الكلام دا هو اللى دارج فى لغة الشباب .. الموسيقى والاغانى لازم ترتقى بالاحساس مش تنحط بيه للدرجة دى يعنى اعتقد ان دى وظيفة الاغانى.. انها تعبر عن احاسيسنا ومشاعرنا ومشاكلنا بشكل مش مسف .. وعشان كدا بحترم مطربين زى عمرو دياب ومنير لانهم مخضعوش للموجة الجديدة وفضلت اغانيهم نضيفة واحسيسها عالية اوى ..

زمان ايام ام كلثوم واسمهان وعبد الوهاب حاربوا بشدة ظهور اغانى عدوية زى " زحمة يا دنيا زحمة .. والسح الدح امبو " واعتبروا انها بداية لانهيار الاغنية المصرية .. امال لو جم شافوا حال الاغنية المصرية دلوقتى على ايد مطربين كبار .. ياترى هايعملوا فينا ايه ؟!..

بجد ياجماعة عاوزين معانى راقية من تانى علشان منرجعش نستغرب ان كلام الشباب بقى كله خللى عندك دم وكبر وقصر ووجعتلى قلبى .. لان كلنا عارفين قد ايه الشباب بيتأُروا بالاغانى .. عاوزين كل اغانينا تبقى من امثال عارفة وتملى معاك وقلب واحد واحمر شايف ومين اللى جوة فى قلبى .. اغانى فيها معانى جميلة ترقى بالمشاعر .. تنقيها .. مش تخسف بيها الارض .. تهون علينا هموم الدنيا وبرده تناقش مشاكلنا بكل صراحة وحرية وعصرية .. ياريت