هاتِضْرب .. هاتتضّرب !

سمعت عن الاضراب من مدونة زميل ,

اضراب 6 و7ابريل 2008 افتكروا التاريخ دا ..

لما سمعت عن الاضراب تحمست اوى ونويت اشارك يمكن يفيد وحاولت انشره على قد ماقدر .. هو اضراب عنوانه " خليك بالبيت وامتنع عن الشراء " بس كل ما كنت اتكلم مع حد يقولى مفيش فايدة ولا هايعمل حاجة اقوله بس اقعد فى بيتك وملكش دعوة بالتانيين .. والاضراب انتشر .. انتشر لدرجة ان بعض الناس الطيبين من شعبنا الطيب افتكروا انه مش اضراب .. دا اجازة .. والكل تعامل معاه على كدا ويمكن دا اللى دفع ناس كتير انهم مينزلوش من بيوتهم .. " كل يغنى على ليلاه بقى !" وماصدقوا ..يعنى المشاركة مكنش بالضرورة انه زيادة فى الوعى عند المصريين دى جت بالصدفة يعنى المدارس اللى كانت فاضية ,اكيد الاطفال مش فاهمين معنى الاضراب لكن اهاليهم خافوا عليهم من المظاهرات اللى ممكن تحصل فا خلوهم يغيبوا عن المدرسة ومش بعيد طلبة الجامعة كمان حصل معاهم كدا .. دا حتى فى اليوم دا كان عندى امتحان وقررت انى انزل امتحن وارجع على طول حتى من غير ما اشترى كيس مناديل من بره - مانا مش هاضيع تيرم علشان الاضراب .. محدش هاينفعنى لما اسقط! -

فوجئت بتليفون قبل الامتحان بساعات قليلة من صاحبتى امنية بتقولى ايه : ايار هو الامتحان اتلغى ؟!

قلت لها : لا ياحبيبتى مين قال كدا .. قالتلى : ماما .. مش انهاردة فيه اضراب .. ضحكت اوى وقلتلها .. ياريت ياحبيبتى بس انتى مسمعتيش بيان الحكومة اللى رعب الناس ؟! الامتحان هايتعمل شئنا ام ابينا .. نبقى نضرب بعديه بقى ...

فعلا بيان الحكومة بحظر الاضراب واستمرار العمل فى الهيئات الرسمية والتحذير بالجزائات للعاملين اللى هايتغيبوا دا كان سلاح ذو حدين .. يعنى كان مفيد ومضر مفيد انه عرف الناس اللى مكنوش يعرفوا عن الاضراب ويمكن دا خلق جواهم تحدى انهم يشاركوا بالعند فى الحكومة .. ومضر لانه خوف ناس كتير اوى انهم يشاركوا وكأن الحكومة بتقولنا : هاتضرب هاتتضرب والبادى اظلم يامعلم !..

وكمان اعلان الاخوان عدم اشتراكهم فى الاضراب - بالرغم من انى مفهمتش ليه اعلنوا كدا - الا انه كان مفيد للاضراب لان لو كان الاخوان اشتركوا كان ممكن يشكك فى دوافع ونوايا الاضراب لان الناس بتتلبش لما تسمع سيرة الاخوان وبيشككوا فى شرعية ومصداقية اى حاجة تيجى من ناحيتهم او يكونوا مشتركين فيها ..

بداية الفكرة اساسا كانت من عمال غزل المحلة اللى دعوا لاضراب عام وشامل لكل فئات الشعب للاعتراض على الغلاء ونقص الاجور ودا بالمكوث فى البيوت والامتناع عن الشراء لمدة يوم واحد .. اليوم دا انا نزلت من بيتنا.. الشارع طبيعى جدا .. مش فاضى ولا حاجة - مع الاشارة ان انا من احدى المناطق الشعبية - ركبت المترو .. المترو برده طبيعى جدا .. مش فاضى ولا حاجة ملفتش نظرى غير ست بتقولى انا كنت هاضرب بس اتصلوا بيا وقالولى هاتاخدى جزا نزلت جرى .. دانا حتى نازلة متأخر! .. وعدى اليوم طبيعى جدا برده من غير مظاهرات ولا حاجة !!

بالرغم من كدا قلت لنفسى : ولا يهمك يابت ارفعى شعار " ابدا بنفسك " وفضلت جعانة لحد ماروحت بيتنا - ادى ضريبة الاضراب !-.. وبعد ماروحت بدأت فى متابعة برامجى المفضلة اللى بعضها هلل للاضراب وفاعليته واظهروا صور للشارع المصرى فاااااضى الا من عربيات الامن المركزى اللى فعلا فاق عددها اعداد المواطنين اللى ماشيين فى الشارع ! , يعنى الحكومة بتجهض الفكرة وهى لسة فى الرحم , وبالرغم من كدا كانت الشوارع فاضية الا من الامن - امال لو كان اضراب كبير شوية ..كانوا هايعملوا ايه؟! -

اللى استغربت له بقى هو الجرايد تانى يوم .. الجرايد القومية صورت الدنيا بمبى وان مفيش اضراب ولا حاجة لأ وايه .. العمال انتجوا اكتر لتفريغ فكرة الاضراب من محتواه .. وطبعا جرايد المعارضة صورت الشوارع والجامعات فاضية ..وكأننا فى بلدين جوة بلد واحد ..ومتعرفش تصدق مين وتكدب مين وكل حد بيجيب لك ادلة وصور !!

وقالت صحف المعارضة ان الموظفين فى الهيئات والوزارات نزلوا خايفين الشغل الساعة 8 الصبح - يعنى قبل معادهم بنص ساعه - حتى الناس اللى متعودين يغيبوا نزلوا برده قبل معادهم ..لكن بذكاء وتحدى شعبى ساذج ..بعد مامضوا وضمنوا ميخدوش جزا .. روحوا بيوتهم الساعه10 الصبح ..يعنى مكملوش ساعتين !! .. اللى يضحك انهم قالوا ان محلات المسلمين قفلت يوم الحد التزاما بالاضراب ,لكن الحكومة اجبرت محلات المسيحيين انهم يفتحوا مع انهم معتادين ياخدوا اجازة فى اليوم دا !!!

اللى احزنى وعجبنى فى نفس الوقت هى احداث المحلة ,بالرغم من الهرجلة اللى حصلت والتخريب ..بس بجد بينت الشعب انه طهق بقى وبدأ يثور وان الناس مش هاتاخد على قفاها من الحكومة وتسكت زى المعتاد , الطريف هو موقف الحكومة .. بعد ما الدنيا ولعت وخربت مالطا ..نزل النظيف نظيف .. ومعاه الحاشية يقولهم : والله مكنتش اعرف ان الدنيا ولعت كدا ..طيب ومقلتوش ليه من الاول كنا عملنا اللازم !!.. وتكرم وتعطف عظمته و ادى شهر مكافأة لعمال المحلة .. قال يعنى كدا الناس هاتتكتم وتسكت " اطعم الفم يستحى العين " .. - طب والنبى تعالوا نحرق لنا كام محل على كام مدرسة فى القاهرة اذا كانت دى الطريقة اللى هاتخليهم يحسوا بينا !!! -

وفعلا اللى حصل فى المحلة دا انا متوقعة ان هايحصل زيه فى بورسعيد بعد اغلاق المنطقة الحرة , واسخم منه فى البلاد اللى الناس استصلحوا فيها الاراضى البور ودفعوا عمرهم فيها ,وجت الدولة بسهولة نزعت منهم اراضيهم علشان تبيعها لشركات يابانية استثمارية وبلاد تانية كتير بيحصل فيها حركات مستفزة اكتر .. اللى حصل دا مجرد درس اتعمله المصريين .. شعللها شعللها ..ولعها ولعها ..وهاتلاقى كله تمام .. والحكومة بتترعب وتبوس ايدك علشان تحقق لك مطالبك ..

يمكن الاضراب مكنش ناجح بنسبة ماية فى الماية لكنه خطوة اولى للعصيان المدنى , وتهديد مستمر للحكومة اذا مافاقتش من الغيبوبة اللى هى فيها ,

واحداث المحلة كانت مهزلة اثبتت سادية الامن المصرى , حتى ان الصور اللى اتنشرت حسستنى وحسست ناس كتير ان اللى بيحصل دا صور فى فلسطين او العراق .. نفس المنظر بنفس التفاصيل .. ناس بترمى طوب على مدرعات واطفال بتحتمى من الرصاص وناس واقعة , وناس بتجرى , ودخان قنابل مسيلة للدموع , ورصاص طايش بيصيب الشباب, واطفال بيعتقلوا بلبس المدرسة !!

مهزلة بكل معنى الكلمة وكأن الدنيا بترجع لورا مش بتتقدم والبلد بتخرب .. بس بالرغم من كل دا فهى خطوة لناس بتقول لأ.. وياريت كلنا نقول لأ .. لحد مايحسوا بينا العالم اللى عايشين فى ابراج عاجية دول !!

ربنا لا تؤاخدنا بما فعل السفهاء منا ....