العيب على مين ؟!

زى اليومين دول من اسبوع كان عيد الام .. انا مكتبتش حاجة يومها ..يمكن لان كلامى كان هايزعل ناس كتير فرحانة اليوم دا .. اول الناس دول هى انا .. انا اول واحدة كنت هازعل .. بس مش عارفة هازعل من نفسى ولا على نفسى .. ومش عارفة كمان كلامى اللى هاقوله دا ينطبق عليا انا بس ولا بقى حالة عامة ..

بجد ياجماعة احساسى بيوم عيد الام دا اختلف عن زمان كتييييير .. دا حتى زمان عيد الام مبفتكرش فيه غير الهدايا اللى كنت بديها للمدرسات بتوعنا بالغصب ..يعنى مش حب ولا حاجة !! .. وطبعا مفتكرش مرتين تلاتة جبت فيهم هدية لماما .. بالغصب برده ..

فى عيد الام اللى فات دا بالذات حسيت احساس غريب جدا احساس كدا وسط .. يعنى مش احساس فرحة وعرفان بالجميل زى ناس كتير , ولا احساس فقد لأم مش موجودة لانها بين ايادى الله .. لأ دا احساس اكثر عذابا .. احساس فقد لأم على قيد الحياة .. احساس فقد للتواصل والحنان .. احساس خلانى افكر فى علاقتنا كشباب بأُسرنا .. احساس خلانى افكر .. هو العيب على مين ؟!

يعنى زمان كان الاب له رهبة وبيرعب كل اللى فى البيت ومكنش حد يقدر يتكلم معاه فى حاجة تخصه .. وكانوا بيبرروا دا انه ادب واحترام !! وكان الكل بيلجأ لامه على اعتبار انها ملجأ الحنان والعطف والتفاهم .. و بالرغم من الاسلوب دا فى التربية كان غلط ,لكن يمكن كان بيحقق معادلة ان فيه طرف بيشد وطرف بيرخى ...

اما دلوقتى بقى , ومع التقدم الرهيب فى كل حاجة الشباب بطبعه بقى انطوائى ومش الشباب بس الاسرة كلها .. يعنى كل واحد عايش فى عالمه الخاص سواء قدام التليفزيون , التليفون, الكتاب, الانترنت , يااما برة مع اصحابه ,فى شغله , فى مدرسته وجامعته , وحتى الاكل بقى نشاط فردى كل واحد بيمارسه على حدا , والشباب - وانا واحدة منهم - حاسين ان اهلهم فى وادى وهما فى وادى.. وانهم بقوا مش قادرين يواكبوا تطورات العصر بكل معانى الكلمة , ومش قادرين يفهموا دماغ ولادهم اللى تطورت بحكم العصر , والاباء بقى كل همهم يلبوا طلبات ولادهم المادية يعنى الام - وامى واحدة منهم - تفكر ولادها اكلوا ولا لأ؟ لبسوا ولا لأ؟ الشقة متروقة ولا لأ؟- وحتى دا مبقاش بيحصل على اكمل وجه يعنى بقى دور فيه قصور كتير - والاب يفكر هو جاب لاولاده الكتب ودفع المصاريف وجابلهم احسن اكل واحسن لبس ولا لأ - ولا دا برده بقى بيحصل بحزافيره ماهى الدنيا بقت قاسية برده عليهم - وينشغلوا هما الاتنين - قصدى الاب والام - فى دوامة الحياة وقسوة الظروف المعيشية وينسوا ان ليهم دور اهم .. دور معنوى كبير يمكن هما بيأدوه بس مش على اكمل وجه ويمكن دا لعدم ادراكهم لمدى اهميته .. يعنى مثلا امى على سبيل المثال كل اللى يهمها ان الشقة تبقى متروقة وان الاكل معمول ومش مهم ابدا تعرف انا عملت ايه فى الجامعة .. كلمت مين وقابلت مين .. واتضايقت من ايه وفرحت من ايه .. يمكن فيه امهات كتير بتعمل كدا ودا نقص عندنا احنا بس .. بس الشائع فى كل الاسر دلوقتى ان طريقة المعاملة بين الشباب وابائهم اتغيرت وبقت اسوأ .. والعيب على الاتنين الشباب - وانا منهم - مش بيحاول يتواصل وبيفضل انه ينعزل فى عالمه الخاص مع اصحابه او قصاد النت على انه يروح يتكلم مع مامته , مع انى والله حاولت ميت مرة ومفيش فايدة .. والاهالى برده مش قادرين يفهمونا .. ولا يحتوونا ولا يقدروا قيمة دورهم المعنوى .. يعنى الحوار كبديل للعصبية والسيطرة .. الاقناع كبديل( ل هو كدا وخلاص ) ومش عاجبك نقى انشف حيطة واخبط راسك فيها .. دا حتى الاقناع بيربى عادة .. لكن فرض الراى بيكوّن موقف وقتى , يعنى لو بابا قاللى متروحيش المكان دا .. ليه ؟ ..هو كدا وخلاص , يمكن يبقى عندى فضول اروح ومش مهم ايه اللى يحصل , لكن لو قاللى متروحيش عشان كذا واقتنعت يربى عندى عادة وقيمة متتغيرش ابدا .. كل اساليب التربية دى اكيد اهلنا عارفينها بس بيريحوا دماغهم ومش بيطبقوها ... ويمكن احنا كمان بقت دماغنا ناشفة اوى ومش بنقتنع بسهولة .. لكن صدقونى الحاجة الوحيدة اللى انا متأكدة منها واللى هاحاول انفذها لما يبقى عندى اسرة ان "الام مدرسة" ودى مش شعارات دا كلام جد الام مدرسة للسلوك والقيم والاخلاق .. يعنى لو الام عصبية بتورث لاولادها العصبية ويطلعوا يتعاملوا مع الناس بعصبية .. ولو الام عندها ذكاء اجتماعى بتعلمه لاولادها .. ولو الام بتتكلم مع اولادها عمرهم مايطلعوا انطوائيين .. ولو الام حببت ولادها فى البيت عمرهم ماهايحبوا يبعدوا عنه .. دى دعوة ونصيحة لانى عانيت من التنشئة العصبية اللى من غير تفاهم .. دعوة لاصحابى البنات اللى هايبقوا امهات ,ودعوة للامهات اللى بقوا امهات , ودعوة لامى لو حد وصلها كلامى وحسته .. ياجماعة الام ليها دور كبير فى تشكيل شخصية ولادها .. ادوهم من الحنان لحد مايستكفوا ومتبخلوش بمشاعركم عليهم ابدا ومتخلوهمش يلجأوا لحد الا ليكم .. وحافظوا دايما على هدوء البيت وبلاش العصبية .. لانها بتورث مزيد من العصبية , واكتبى النصيحة دى فى كل انحاء شقتك ونفذيها .. لانى انا هاكتبها وانفذها:

" يجب ان تجعلى الاوقات التى يقيضيها اولادك فى البيت سعيدة , حتى يقضوا منها المزيد " ..

ربنا يخلي لنا بهبهاتنا ومهمهاتنا ويخلينا ليهم ونفضل مشيلنهم الهم كدا على طول ويستحملونا دايما .. امال خلفونا ليييييييييه ؟!