انا انسانة بلا ماضى.....

كتير من الناس بيقولوا " اخر العنقود سكر معقود " .. اكيد طبعا لان انا اخر العنقود.. مع ان احنا عنقودنا قصير اوى مفيهوش غير حبيتين بس ..هما انا واختى , والناس بيقولوا كمان ان اخر العنقود دا دايما بيبقى متدلع .. لكن فى دى انا مش موافقاهم 100% - او على الاقل فى حالتى انا - ..

احكيلكم من الاول ..

كان ياما كان فى سالف العصر والاوان وتحديدا يوم 10 3 1978 ...اتولدت كريمة الصون والعفاف اذار حسن - عاوزة الهدايا ترف عليها بقى! - وكانت المولودة الاولى لابويا الكاتب العظيم حسن ابو العلا .. وطبعا طار بابا من الفرح .. وساعتها كانت ايام عز .. وكان عندنا كاميرا ..ولان اختى كانت المولدة الاولى ..بابا طبعا كان هاريها تصوير .. من اول يوم اتولدت فيه ..وهى نايمة وهى قايمة وهى بتبربش وهى بتتاوب الخ الخ الخ .. يعنى كان متابع كل تحركاتها .. وطبعا صور اول صرخة واول خطوة واول سقفة وكله كله .. ولما كبرت اذار .. هما مسكتوش .. اول عيد ميلاد ليها دا كان يوم مشهود .. وكل الصحف والمجلات كانت بتصور - مش اوى كدا يعنى دا من نسج خيالى! - وبابا صورها وهى مركزة اوى فى طبق الملوخية .. وانا مبنساش الصورة دى وبتموتنى من الضحك وكان كل اعمامى وخالاتى وعماتى بيتعزموا - هما مش كتير يعنى بس برضه -.. وصورها وهى على المرجيحة دا غير الخروجات .. اشى جنينة الحيوانات والملاهى والمصايف وكله تصوير تصوير تصوير .. فاضيين بقى موارهمش حاجة .. وتمر عشر سنين طوال عراض ويحصل فيهم اللى يحصل ..ويشرف جنابى .. ويحالفنى سوء الحظ من اول لحظة .. بداية بابا مكانش عاوزنى .. ولما تقبل الوضع .. كان متخيل انى ولد .. قال ايه لانه زهق بقى من البنات وعاوز ولى العهد اللى يشيل اسمه , ولما جيت بنت بابا كان منفضلى تنفيضة فُل .. لا وجاتله الجراة انه يعترف لى لما كبرت انه مشالنيش الا لما بقيت شهرين ..تخيلوا !.. لا وايه .. لما ضحكتله قوى وشابيت عليه , قال :بنتى بقى ومبدهاش - وهو مينكرش انه وقع فى غرامى من ساعتها !! - اللى يضايق بقى انه فى الفترة اللى انا جيت فيها كانت كاميرتنا باظت .. وطبعا مكناش لسة دخلنا عصر تكنولوبيا الموبايلات والذى منه .. وعشان كدا اول الصور اللى اتصورتها كانت الصورة اللى قصادكم دى - واللى انا فيها عندى حوالى سنة - وكمان متصورة فى استوديو .. لما ماما فاقت وقالت نصورها .. وشوية صور قليلة جدا لا تتعدى صوابع ايدك الواحدة ..تخيلوا ياجماعة لما تبقى انسان ناضج زيي ومتعرفش شكلك وانت نونة كان ايه ..احساس وحش اوى صدقونى .. بغض النظر عن ان الخروجات اتقطعت ومتفسحتش نص فسح اذار .. ولا اتعملى عشر تلاف عيد ميلاد زيها اهئ اهئ اهئ .. انا مش بحقد عليها والله .. انا بقر بس ! .. انهاردة كنت عند اية صاحبتى وشفت كل صورها وهى بابى .. واتضايقت اوى .. وزعلت من بابا وماما اوى اوى .. وملقتش حد اشتكيله غيركم .. يعنى انا ذنبى انى اتولدت لما بابا وماما كبروا ؟ ولا ذنبى انى اتولدت لما الكاميرا باظت؟ ولا ذنبى انى محفظتى ضاعت وخدت ماضيا كله معاها .. حتى صور ثانوى واعدادى ؟؟؟! وبعدين قلت لاية :"يعنى انا لو اتجوزت دلوقتى جوزى هايلاقى ايه يقعد يتريق عليه ؟؟؟! " .. عيب كدا والله .. وعشان كدا انا نازلة تصوير فى بشرى بنت اختى وتقريبا بصورها كل يوم .. والحمد لله اننا دلوقتى عندنا 4 موبايلات بكاميرا - ماشاء الله يعنى- ...وكمان بروق نفسى انا دلوقتى ومبسبش فرصة انى اتصور فى اى مكان اروحه ..انشالله مراجيح السبتية ! وعلشان مكنش ظالمة انا دلوقتى قلب بابا وعقله وبجد بيدلعنى موووت وبيثقفنى كمان .. وزى مابيقولوا ان انا اللى على الحجر .. وقالى كدا فى قعدة صفا : " والله ..الله يكون فى عونه اللى هايتجوزك دا ..هاياخدك من حبابى عينيا" انبسطت اوى من الكلمة دى وكان نفسى اخده بالحضن لولا اننا كنا ماشيين فى الشارع .. وبجد سامحته على انه مصورنيش .. وقلت يلا خليها عليا انا الكبيرة ..

عشان كدا بنصح كل اللى بيسمعونى - والله مالينا الا بعضينا على راى هنيدى !- المهم بجد حاولوا كدا لما ربنا يكرمكوا وتخلفوا تسجلوا كل لحظة لاولادكم من اول ولادتهم وفسحوهم وخرجوهم .. عشان ميطلعوش معقدين كدا زيي .. ومتتصوروش الموضوع دا بيفرق مع البنى ادم قد ايه... اتفرجوا بقى على كليب انا عاملاه لبنت اختى .. ربنا يخليها لينا ياااارب وتفضل منورة حياتنا دايما !!