الليلة الكبيرة ياعمى والعالم كتيرة ..

امبارح كان مولد النبى ..

كل سنة وانتوا طيبين ..

قبل التدوين المناسبة دى كانت بالنسبة لى مجرد ان بابا بيجيب لنا حلاوة المولد وناكلها وكان الله بالسر عليم .. واحيانا بس مش كتير كان بابا بيكبر دماغه ومش بيجيب حاجة .. لكن لما عملت المدونة وجات المناسبة دى قررت انها متفوتش كدا .. وان انا لازم اكتب انطباعاتى عنها .. فقلت ياترى اكتب ايه ؟!

لما ببص لمصر وخاصة فى منطقتنا كل سنة بلاقى نفس التقليد .. اربع خمس نصبات تتنصب .. تواشيح غريبة كدا تشتغل معرفش دا مدح للنبى ولا ايه .. وحلاويات من كافة الاشكال وعرايس وحصنة من السكر .. واللى تطورت دلوقتى وبقت عرايس بلاستيك بتنور ...

وسمعت فى برامج وفى الجرايد - وانا مع الراى دا - اننا مش المفروض نحتفل بالمولد النبوى بالشكل دا يعنى مجرد حلويات وخلاص .. لان هدف الاحتفال بمولد اشرف الخلق عليه افضل الصلاة والسلام واللى كان يوم وفاته كمان .. اننا نحيي سنته من صوم وصلاة وزكاة واكرام الجار وصلة رحم وكل مكارم الاخلاق اللى بنقتدى بيه فيها يعنى مش مجرد شوية حلويات وعروسة حلاوة - الشيوخ قالوا انها تماثيل والمفروض انها لو اشتريناها ناكلها على طول او تبقى مقلوبة على وشها - بس انا شايفة اننا كدا بنحبكها اوى يعنى علشان اوضح وجهة نظرى .. انا شايفة ان الاحتفال اللى احنا بنشوفه لمولد النبى دا من التقاليد .. والتقاليد القديمة اوى كمان ,وان دا كدا زى الفلكلور حاجة وارثينها عن جدودنا وجدود جدودنا وحلو اننا نحتفل بيه لكن الاهم من شكل الاحتفال دا هو ان كل واحد يحيي سنة النبى صلى الله عليه وسلم فى قلبه وعقله وتصرفاته .. مش تبقى مجرد شكليات وخلاص ..

كلمة مولد النبى دى فكرتنى بالموالد اللى بتتعمل لناس كتير اوى اغلبهم معرفهمش .. زى مولد السيدة والسيد البدوى ومولد سيدى الطشطوشى و مولد سيدى القناوى ومولد سيدى محمد البحر ومولد سيدى الشعرواى ومولد سيدى الدسوقى -طبعا دول ولا سيادى ولا اعرفهم بس هما بيقولوا عليهم كدا - وموالد كتير فى كل انحاء مصر فى القاهرة وطنطا وكفر الشيخ وغيره وغيره ولكل منطقة مولد خاص بيها .. الموالد دى بكل الممارسات اللى فيها نوع من الفلكلور ..لكن برده مش لازم نسلم بصحتها وخاصة الحضرة وحلقات الذكر ولا الستات اللى بيبقوا راكبين على عربيات كارو ونازلين زغاريد ! وكأنهم مكبوتين وبيخرجوا طاقة وخلاص !.. دانا سمعت كمان ان فيه موالد للمسيحيين زى مولد جبل الطير واللى بيعملوه على جبل .. بس برده الفضول بيدفعنى دايما انى اروح اشوف العالم دا ايه اللى بيحصل فيه .. انا كل صورتى المرجعية عن المولد هو اوبريت الليلة الكبيرة والافلام مش اكتر .. اللى بيبيعوا فيه حب العزيز والحمص وفيه زق الطارة وفرقعة البومب والنشان ..لا والاهم رقص الغوازى !! ونحط عند دى ميت خط - يعنى مولد مبروك لحد مبروك ويبقى فيه رقص ومسخرة .. دى ازدواجية فى الرؤية ولا ايه .. يعنى المفروض المولد دا هدفه دينى ليه يتحول بالشكل دا .. لا تعليق - ..

والمولد برده - على حسب ثقافتى الافلامية - مبيخلاش من عيل ولا عيلة تايهة , وساحر بيلعب بالبيضة والحجر ,وحد بيرقص قرود ويروض حيوانات مفترسة, وناس قاعدة على القهاوى .. عالم لوحده المولد دا لا واهدافه متعددة كمان وبتختلف من حد للتانى .. انا اعرف ناس كل هوايتهم فى الحياة يلفوا على الموالد مش علشان ذكر ولا بتاع بس اهى فنفنة وجو جديد !.. وللاسف بابا مرضيش اروح معاهم احضرلى مولد انا كمان .. بس انا والله نفسى اروح مولد .. يعنى من باب العلم بالشئ ..واعتقد انها هاتبقى مغامرة حلوة .. محدش يعرف مولد قريب ينفع اروحه ؟؟ ولا حد راح مولد قبل كدا يعرف يحكيلنا الحاجات اللى بتحصل بالظبط ؟؟

هاستنى ردودكم .. يلا اما اقوم اسوس لى سنتين بحلاوة المولد .. سلام !