خدوا بالكوا .. من حماركوا !!

تفتكر انت كلت كام حمار لحد دلوقتى ؟!

متستغربش ..

انا برده استغربت من السؤال دا فى الاول ..

لكن السؤال بقى منطقى لما عرفت الحكاية اللى هاحكيهالكم دى..

من فترة قريبة قعدوا يقولوا ان الجزارين بيدبحوا الكلاب ويعملوا منها الكفته .. طبعا انا مصدقتش .. بسذاجتى المعهودة .. وحتى كنت بتريق على الكفتة اللى بنجيبها وبسميها " كفتة كلابى " وباكلها عادى ..وبعد كدا برده سمعت عن ان الجزارين بيدبحوا الحمير ويبيعوها على انها لحمة عجل او بقر .. وبرده مصدقتش .......

لحد ماشفت بعنيا ..

قصدى شفت بعين نجاة ..

الصحفية اللى اتخفت ودخلت وكر باور فاميلى ( قصدى دخلت وكر الجزارين ) وصورتهم وهما بيدبحوا الحمير .. وبيشفوا الكلاب -والله كتر خيرهم مش هايبيعوها بعضمها - نط فى دماغى على طول حكاية سمعتها بالصدفة من حسام اخو ايناس انتمتى ..حسام دا عنده حوالى 13 سنة .. راح حذر مامته وقالها ياماما متشتريش كفته من الكبابجى اللى على ناصية شارعنا علشان انا شفت الصبى بتاعه بيجر كلب ميت ويوديه ناحية الحتة اللى بيعملوا فيها الكفتة- يعنى كلب .. وميت ..سبحان الله !! - فقررت انا وايناس وعيلتنا وعليتهم .. منكلش من الكبابجى دا ..

لحد ماسمعت قصة نجاة .. وشفت بعينى محدش قالى .. قررت انى مش بس اقاطع الكبابجى انا قررت مقاطعة اللحوم حتى اللى ماما بتعملها لمدة شهر - لحد مانسى - ومقاطعة اللحوم اللى بتتباع بره لاجل غير مسمى - لانى معتقدش انى هانسى - ..

يعنى المسألة مجتش عند بيع لحوم فاسدة ولا مريضة ولا منتهية الصلاحية .. ولا حتى حيوانات ميتة .. الموضوع بقى اكبر من كدا نجاة الصحفية بجريدة 24 ساعة بتقول :ان اللى شفته دا فسر لى ازاى بيبقى سندوتش الفول بجنيه وربع .. ورغيف الحواوشى بنص جنيه فى مناطق كتير وان كيلو اللحمة فى العتبة بستة جنيه ! الموضوع دا كان فى العاشرة مساء ..

منى طبعا مسكتتش واستضافت مسئول .. بصراحة هو محلش حاجة لكن ادانا معلومات مهمة احب اقولهالكم ...

# فى البداية ارجع الازمة دى لنقص عدد الدكاترة البيطريين لان عدد الدكاترة البيطريين 7 الاف دكتور بس فى مصر كلها ونصهم مشغولين فى مكافحة انفلونزا الطيور - منين فيه بطالة ومنين فى عجز فى عدد الدكاترة ؟! يلا يابتوع طب بيطرى هيصوا !! -

# وقال ان لحمة الحمار وهى نية لونها غامق ولو قعدت فى الهوا شوية يتحول الى ما يشبه الصدا - يع -

# عضلاتها رفيعة بعكس البقر والجاموس - ودى حاجة يفهم فيها ستات البيوت بقى -

# لو اتدبسنا فيها واشتريناها بتعمل بقع دهنية عند سلقها وبيبقى طعمها مسكر !

# وعشان كدا نصح بالتعامل مع جزار موثوق فيه - انا بقيت اشك فى نفسى اصلا ! -

# ولا عزاء بقى للى بياكلوا بره لان اللحمة لما بتتطبخ او تتفرم .. انتهت .. ولا هاتحس بحاجة!!

الغريبة بقى انى سالت نفسى سؤال :

هو يعنى الناس اللى بتعمل كدا دى مش خايفة تقع فى نفس الحاجات - ولا هما بقوا خبرا - يعنى من باب "من حفر حفرة لاخيه وقع فيها" يعنى مش شرط ياكلوا لحم كلاب ولا حمير لكن ممكن يقعوا فى لحوم فاسدة - ويغوروا فى داهية بسببها - اصل داين تدان والله ..

ولا حتى مش خايفين يقعوا فى العصير اللى مغسول فى البانيو واللى معصور فى الغسالة واللى بتقدمه افخم الفنادق .. ولا مش خايفين ياكلوا فراخ ميتة فى كنتاكى ؟!

حادثة نجاة دى كانت فى البساتين وهى قالت ان اللحوم دى بتتوزع فى كل انحاء مصر .. مع ان الحمير غالية والله مش عارفة ايه اللى جابرهم ؟!

انا مش محتاجة طبعا بعد اللى قولته دا اقولكم حالتى بعد ماشفت الصور بقت ايه ..

ورحت تانى يوم الجامعة قرفانة حتى من نفسى وعمالة اشك فى كل حاجة واى حاجة وقررت اكل فول وفول وفول لان حتى الطعمية والبطاطس زيتهم بيبقى استغفر الله العظيم ..

المهم بقى التعليق اللى عجبنى ان واحد بيقول ايه :

احنا بنعتمد فى الاول وفى الاخر على معده المصرى اللى بتهضم الزلط ..

وربنا شعب غلبان !

وبرده مش محتاجة اوجه دعوات شديدة اللهجة للى بيقروا الموضوع انهم لازم يقاطعوا اكل الشارع - حتى فى المطاعم الفخمة - لان اللى قريتوه كافى ... لكن هاوجه تحذيرات شديدة اللهجة لصاحبى الحمير ..

ياجماعة خدوا بالكوا من حميركوا ..

علشان منسمعش فى الفترة الجاية عن سرقات للحمير تستقر فى بطون المصريين !!!

وفى نهاية كلامى احب اوجه سؤال برئ للفنان العظيم سعد الصغير .. اللى غنى الاغنية العظيمة " بحبك ياحمار" :

ايه احساسك بعد الموضوع دا ؟؟؟؟؟!!