انا بكره حسنى مبارك وبقولها لو اتسال .. واكيد هاموت قتيلة او اخش المعتقل واييييييه..
انا بكره حسنى مبارك وبحب عم انور بتاع البليلة !
رساله من احمد فؤاد نجم الى الرئيس مبارك :
سيدي الرئيس في عيد ميلادك الكام وسبعين
كل سنة وأنت طيب
واحنا مش طيبين
كل سنة وأنت حاكم
واحنا محكومين
واحنا مظلومين
واحنا متهانين
ويا ترى يا حبيب الملايين
فاكرنا ولا احنا خلاص منسيين
فاكر المعتقلين
فاكر الجعانين
فاكر المشردين
فاكر اللي ماتو محروقين
فاكر الغرقانين
الله يكون في عونك
- هاتفتكر مين وللا مين
في عيد ميلادك الكام وسبعين
بقول لك كلمتين
الأوله شيلتنا طين
وهل تعلم أن النيل بقى رشاح
والجو أصبح بيئة
والعيشة ولعة
والشرفا قلوبهم عالبلد والعة
وانت عاملهم مذبحة ولا بتاعة القلعة
والاقتصاد سداح
والسرقة بقت كفاح
ومصر متاحة بس للسياح
وعرض البلد بقى مستباح
والتانية ورتنا الويل
دا الخطوة في عهدك بقت ميل
والضحك بقى نواح وعويل
والكوسة عارف الكوسة
ممكن أقولك فيها موواويل
والجامعة بقت يا إما كباريه
أو دار مسنين
والشباب معظمهم من غير خمرة سكرانين
والعلم عز على المتعلمين
والأساتذة بقم دجالين
والقادة بقم طبالين
واديني في الهايف يا حبيب الملايين
والتالتة عارف اليابانيين
زمان في سنة اتنين وخمسين
كان عندنا تروماي وكان عندنا علم ومتعلمين
وثقافة ومثقفين
وأدبا وعلما وفنانين
وكانو اليابانيين
بالنووي لسة مضروبين
وللصدقة مستحقين
دلوقتي إحنا فين وهما فين
هما فوق واحنا في أسفل سافلين
والرابعة أمن البلد بقى تنين
والمحاكم اتملت مظالم
والعدالة بقت كمالة
وكلمة الحق في الزبالة
وأصحابها في الزنازين
والخامسة القطاع العام…. عام
والفساد…. ساد
وفي جتة بلدنا بيرعى
أفتكر لجنابك إيه وللا إيه
وكل ذكرى ليك بدمعةآآآآآآآآه آآآآآآآآه
أنا كنت حالف ميت يمين
أكملهم لك تمنية وسبعين
بس هاكفيهم ورق منين
وكل سنة وأنت
واحنا طيبين
الله يانجممممممم فشيت غللى ربنا يخليك .. وياريت يفهموا البعدا التانيين..!
.jpg)
هناك 15 تعليقًا:
الصورة جبارة جداااااا
وربنا يستر عليكي وعلى عم نجم
وربنا يدي لمبارك طول العمر والعافية
آية صادق
ويدينا احنا كمان طولة العمر لحد مانشوف رئيس غيره وغير ابنه امييييييييييين يارب
احمد فؤاد نجم ده بجد رائع
والصورة جااامده موووت
واحب اضم صوتى لصوتك فى حب عم انور على الاقل هياكلنا بليله .... يالا اهو احسن من مافيش
اهئ اهئ....بس انا مش بحب البليله
هههههههه ليه ياخوخة دى البليلة جامدة بس اكيد بتحبى الفول .. ماهو بيبيع فول وبليلة !
صبرنا ياااااااااااارب
زيارتك ليا شرفتني جدا جدا ونورت بيتي المتواضع ويارب دايما يعبجك
مدونتك من اجمل المدونات الي زورتها ليا طابع خاص مختلف تماما اكيد الطابع دة مش غيرب علي ذوق صاحبتها الجميل
(ايقون مكسوف)
امابخصوص موضوع البوست
فالدنيا كلها بتكره حسني والشعب المصري كله قالها والشعب المصري دخل المعتقل الكبير الي هوة مصر الي حولها حسني واتباعه الله يايحرقهم كلهم من جنه ومن كنانه الله في ارضة الي بلد جحيم ومعتقل كبير اوي الناس كلها بتهرب منه وبتتمني تلاقي اي مخرج للهروب منه
فعادي بقي ما تقلقيش هيا كدة كدة بايظة قولي الي نفسك فيه
هههههههههههه
ياريت تزرويني تاني واتمني ان نكون اصدقاء
عبدالرحمن
ايه الكلام الجميل ده والله صورة صادقة جدا وجميلة ولا تحسبن الله بغافل عما يعملون
شكرا يا ايار
صانعه الاحلام : شاكرة مرورك وفعلا يا حبيبتى مش قدامنا غير الصبر بس منين نجيبه !
عبد الرحمن : اخجلتم تواضعنا وانت اللى مدونتك رائعة يابنى وربنا يوفقك اكتر واكتر .. وانت يابنى شكلك مغلول اوى بس اكيد مش قدى .. (وش بيغمز) هههههههه
نونوش : فعلا يابنتى بس هما مش حاسين ان فيه يوم حساب ولا ان الدنيا فانية..
عبد الحمن : يسعدنى طبعا نكون اصدقاء دى حاجة تشرفنى ..
حلو الكلام بس ممكن اكتب طلب
يعني حاولي توظفي موهبتك الحلوة في الكتابة في مناقشة حجات من نوع تاني مش شرط السلطة والحكومة
انا عرفة ان ده رأيك وانتي حرة
وان دي مدونتك واحنا ضيوف وبس
بس انا فعلا نفسي اقرالك قصة مثلا
موقف ظريف حصلك
قضية وبتناقشيها بأسلوب ساخر
حتة رومانسية كده تبين جمالك الي جوه
يعني فهماني
حباكي تنوعي في الي بتكتبيه
لان اسلوبك رائع وبجد هتكوني مدونة مشهورة وروادك هيكونوا ياما
وانشاء الله اضيفك طبعا
بصى يا مهموه -دلع مها- انا فعلا هانفذ نصيحتك الغالية بالنسبة للقصص انا ليا قصة قصيرة واحدة كتبتها لانها حاجة حركتنى فاكتبتها غير كدا انا مبكتبش قصص بالنسبة للمواقف اللى بتحصلى حاضر انا فعلا هاتجه لدا لكن يمكن فى الفترة اللى فاتت كانت الاحداث السياسية هى اللى بتحركنى انى اكتب لكن والله لو رحتى للرسايل الاقدم هاتلاقى شعر وقصة ومقالين عن الحب واكيد هاكتب تانى ماهى مش كل الحياة سياية يعنى .. مستنية اضافتك على الميل..
اولا السلام عليكم انا بصراحة شدنى الاسم البهايم اللى فوق قبل مافتح المدونة تقريبا عرفت اللى فيها لان مفيش بهايم فوق غير اللهم محفظنا
بجد الكلام بتاع العظيم احمد فؤاد نجم هايل
وبيعبر عن كل كلمة نفس اى مصرى يقؤلها
اما صورة جلالة الملك دى حكاية بس فين صورة الامير جمال سمو ولى العهد كدة سموه يزعل
عمتا ربنا يوفقك وتجبلنا اشعار كمان وكمان وربنا يسترها علينا وعليكى ويجعل كلمنا خفيف عليهم قولى امين
الاغنية دى اديها لشعبولا
محمود : ميرسى على تعليقك وفعلا ربنا يجعل كلامنا خفيف عليهم ..
اريد عريسا : هههههههه ضحكتينى موووووت بس تفتكرى شعبولا يرضى ؟!
بكره حسنى مبارك وأقولها لو أتسأل
إن شا الله أموت قتيل أو أخش المعتقل
علشان دمك تقيل والناس كلها كارهاك
بتعشق الخراب و بتكره العمار
مين يرضى الظلم ليه ؟
طول عمر مصر راسية وبتستحمل كتير
بكره حسنى مبارك عشان جنوب لبنان
والقدس والعراق و سوريا والجولان
فيه ناس عايشاها بالدقة
لا شافوا سمكة ولا سجقة
إرسال تعليق