يافرحة ماتمت!

كان نفسى اسيب موضوع الفلانتاين دا يفضل فى الاول لحد ما يوم عيد الحب يخلص لكن يافرحة ماتمت.. سمعت خبر زعلنى جدا جدا وقلت لازم اكتب انطباعاتى عنه..

فى العاشرة مساء جابوا تقرير عن قرية من قرى الفلاحين بعض الاهالى فيها بنوا على الارض الزراعية فطبعا الدولة مسكتتش واخلوا الاهالى وهدموا البيوت بالقوة .. اه بالقوة ..وحتى من غير ما يدوا انذار للاهالى علشان يرتبوا امورهم صحيوا لقوا نفسهم من الدار .. للشارع ومش لاقيين مأوى ياويهم!!

انا طبعا ضد اى محاولة للبناء على الارض الزراعية لان العملية مش ناقصة.. علشان الاجيال الجاية تعرف تاكل.. لان لحد فترة قريبة كنا بنقول ان مصر بقت 70مليون وكنا مستكرترينها وبنقول دى كارثة لكن قريب سمعت ان مصر بقت 75 بعد كدا 80 مليون _ مصر بقت 80 مليون يارجالة _ انتوا متخيلين كل دول عايشين على 6 او 7 فى الماية من مساحة الارض كلها ( مزروعة ومش مزروعة) فا ماينفعش المساحة المزروعة دى تقل بالبناء عليها..

لكن انا برده ببص للموضوع من الجانب الانسانى يعنى تشريد عشرين اسرة وبالطريقة دى حاجة متنفعش ومن غير مايشوفوا لهم حل الاول قبل ما يخرجوهم من بيوتهم ويجيبوها على الارض ..

يعنى ست فى التقرير بتقول : ان كل فلوس الصبة اللى بنينا بيها البيت عليها شيكات وهانتبهدل ..

وواحدة تانية بتقول : ملحقناش نلم عزلنا ورموا علينا قنابل مسيلة للدموع .. واحنا بنينا لما المهندس الزراعى قلنا ابنوا وخد مننا خمس تلاف جنيه..

يعنى هايلاقوها منين ولا منين من النصب ولا من الدولة؟؟

ايه الهمجية دى فى التعامل مع الناس ؟!.. وليه الدولة لما تيجى تاخد حقها بتاخده بسرعة اوى كدا واحنا لما نيجى نطالب بحقنا تديهولنا بالتقسيط المريح_وياريت بناخده كامل ولا حتى بناخده اصلا!_ واحنا صابرين ومستحملين..

هو الانسان فى مصر بقى هين اوى كدا وملوش كرامة ؟

هما يعنى علشان فلاحين ومش مدركين للوضع اللى حواليهم نستغل طيبتهم ؟ ولا علشان هما فئات مهمشة ومش هايعرفوا ياخدوا حقوقهم؟!

هى الدولة تفشل فى مشروعات التوعية بتنظيم الاسرة ويزيد عدد السكان وميلقوش مكان يسكنوا فيه وفى الاخر نيجى نطردهم ونشردهم , ماهو مش باديهم والمضطر يركب الصعب..

ارتفاع السكان بقى قنبلة موقوتة هاتؤدى لكوارث فى الايام الجاية والايام دى مبقتش بعيدة ,والحكومة مش عاوزة تتوسع فى الصحرا واى حد عاوز قطعة ارض مش بتسهل اجرائاتها بل بالعكس بتفرض ضرائب وغيره وغيره ..ليه منعرفش مع ان استصلاح الصحرا فى مصلحة البلد حتى من الناحية السياسية _علشان تحمى حدودها_ معنى كدا ان اللوم مش على الفلاحين..

يارب .. يارب اصحى بكرة الاقى حكومة خايفة علينا وبتحترمنا وبتوجه فلوسنا صح تفتكروا ممكن ولا هو مجرد حلم؟!