ازمة النهايات فى السينما المصرية ..

كنت بحضر عرض فيلم " خارج عن القانون" فى نقابة الصحفيين - يعنى ببلاش ..ودا يبينلك سبب استمتاعى بالفيلم !- وبصراحة انا بشكر نقابة الصحفيين على المهرجان الاكتر من رائع ده , لانه بيخلينا نتفرج على كل الافلام الجديدة من غير ماندفع لا مليم - اصل الاسعار بقت نار وحتى السينمات غليت! - المهم .. فى ندوة الفيلم استضافوا الصحفى والسينارسيت بلال فضل .. ولانى كنت العنصر النسائى الشبابى الوحيد اللى رفع ايده فاطبعا سمحولى اتكلم .. بصراحة انا عجبنى الفيلم وكنت مشدودة من اول لقطة وعجبتنى التقنيات - وقلت والله عمار يامصر - لكن بصراحة اول ما بدأ كريم يواجه جيش من الشرطة بعربية نص نقل ويقدر يهرب من كل المواجهات دى قولت ايه -بدأنا !- واتأكد احساسى بأن النهاية هاتبقى تقليدية وسخيفة, وفعلا المشهد الاخير الصراحة اثار سخطى على الفيلم كله - ودا اللى قلته لبلال - ببساطة كريم فى اخر مشهد لعب دور البطل الذى لايقهر وموت جيش برده - بس المرة دى من رجالة السويسى رجل المخدرات اللى كان بيأويه واكتشف قتله لابوه - لا مش بس كدة هو كان متحصن فى بيت حبيبته, والسويسى ورجالته تحت يعنى كريم فوق والشريرين تحت ,يعنى كريم فى مركز قوة ودا يمكن يبرر شوية انه قدر يقضى على كل الرجالة دى.. لكن اللى مش مبرر بقى ,انه ينزل من مكانه اللى هو -فوق- علشان يتكلم مع السويسى !!! ويقولوا كلام مطاط ولم يضف اى جديد ,علشان السويسى يقوم ضارب كريم فى كتفه - علشان هو وحش برده مش شريف.. مهو مهما كان تاجر مخدرات برده - علشان بلال من وجهة نظره ان كريم برده كان لازم يتعاقب ! وعلشان كريم يموت السويسى بطلقة فى دماغه ! ياااااه بجد حسيت وانا خارجة من الفيلم انى بقول فى سرى .." ليه بس كدا يابلال .. يعنى تفضل طول الفيلم ماشى كويس ..تتزنق فى قفلة سخنة تقوم عامل قفلة هبلة ؟؟؟! " ..
نهاية الفيلم دا اثارت جوايا رؤية شاملة لاغلب نهايات الافلام المصرية من اول رصيف نمرة خمسة, واغلى من عينيا لفاتن حمامة ولحد فيلم ابو على وخارج عن القانون وغيرها كتير , وعلى فكرة الموضوع دا مش بيتأثر بحجم الانتاج يعنى ممكن فيلم يكون مصروف عليه كويس اوى وكل احداثه كويسة ويجي الكاتب ميعرفش يحل الحبكة اللى بيحبكها فايلجأ لمعالجات غريبة اغلبها يتلخص فى اما موت البطل او البطلة او وصول الشرطة فجأة وبدون سابق انذار - وتسأل نفسك ساعتها هو مين اللى طلب الشرطة؟! فا متلاقيش اجابة فا تسال اللى حواليك يقولولك شششششش اتفرج وانت ساكت .. ودا علشان هما كمان مش فاهمين مش اكتر! - , او البطل هركليز اللى بيضرب عشرة بضربة واحدة .. وبعدها البطل والبطلة يتجوزوا ويعيشوا فى تبات ونبات - ولا عزاء للمشاهدين المساكين - !

موضوع النهايات دا هو اللى بيفرق السينما العربية عن السينما الاجنبية لان الناس دى بتحترم عقل المشاهد وتفكيره , بغض النظر عن الامكانيات ..لان ممكن فكرة حلوة اوى تتنفذ ومش شرط الامكانيات - هى طبعا مهمة - لكن احنا احيانا ممكن نغفر لفكرة متنفذة حلو وتصاعدها الدرامى كويس وحل الازمة جامد, لكن انتاجها ضعيف ونقول يااه لو الفكرة دى كان اتصرف عليها كانت هاتبقى طلقة, لكن مابالك بفيلم بيتصرف عليه قد كدا وتخرج منه تقول - ايه النهاية الخايبة دى ؟! _ منكرش ان فيه افلام مصرية كتير اعتمدت على نهايات قوية زى تيتو واللى مخضعش لمعايير السوق اللى بتقول ان لازم المشاهد يطلع سعيد , وكمان ويجا اللى اعتمد على النهاية المفتوحة وغيرها افلام كتير احترمت عقل المشاهد وممشيتش مع الهوجة.. لكن برده فيه افلام كتيرة ودا الاغلب نهايتها مجرد - ضحك على الدقون - , ياترى هل دا استخفاف بعقول المشاهدين واعتقاد فى سذاجتهم ؟ولا لان الكتاب دول بيبقوا بيكتبوا علشان سبوبة ؟ولا علشان عارفين ان الشباب داخل يفنفن مش اكتر ؟ ولا هو قصور ابداع ؟ ولا ايه .. فكروا معايا ..