الفلانتاين valentine's day

كتير مننا بيردد كلمة الفلانتاين من غير مايعرف معنى الكلمة دى ,والمصريين بقى اختصارا للوقت والجهد سموه عيد الحب !..

وكتير من الشباب بقوا بيقولوا اختصارا " هابى فلانتينو" واللى طلعت منها الكلمة الشهيرة " هو انت فلانتينو عصرك واوانك؟"

حبيت بمناسبة عيد الحب اقولكم قصة ال valentines day واشمعنى يوم

14 -2 تحديدا..

_بغض النظر عن ان مصر عملتلها عيد حب لوحدها فى شهر 11 ماحنا لازم نتفزلك ونتفرد فى كل حاجة _ لكن انا بتكلم عن اليوم اللى بيحتفل فيه العالم بعيد الحب ..

نبدأ الحكاية...

كان ياما كان فى سالف العصر والاوان وتحديدا ايام الرومان ..

_ انفع اكتب شعر مش كدا؟!_ كان فيه حاكم رومانى ظالم لقى ان الجنود المتجوزين فى جيوش الرومان بيأدوا اداء اضعف من الجنود العزاب _ الله يكون فى عونهم حقيقى _ المهم عمنا الحاكم الرومانى قام قايل : محدش يتجوز ممنوع الجنود تتجوز!

وكان فيه قديس طيب واحاسيسه مرهفة عرف بالمشكلة دى وصعب عليه ياعينى الجنود المحرومين دول واللى بقت كل حياتهم حرب وضرب _ مش بقولكم انفع اكتب شعر _ المهم بدأ القديس الطيب فلانتينو .. يوووو قصدى فلانتاين بدأ يجوز الجنود دول بالبنات اللى بيحبوهم فى السر وفضل كدا لحد ماعرف الملك بالموضوع _ اصلها حاجة متستخباش طبعا!!_ عشان كدا اعتقل الحاكم الرومانى القديس فلانتاين وحكم عليه بالموت _ بس معرفش الوسيلة اللى مات بيها الكدب خيبة !_ ومات القديس فلانتاين يوم 14-2 فى مشهد ماَساوى علشان يخلد ذكره ويبقى يوم وفاته عيدا للحب...

_ وكفاية كدا لحسن هاعيط..._

وتوتة توتة فرغت الحدوتة .. حلوة ولا ملتوتة.....

يارب اكون افدتكم وياريت كلنا نحب بجد ونحب كل حد وكل حاجة حتى شغلنا_معلش تعالوا على نفسكم_.

واهى فرصة عيد الحب السنة دى جاى يوم الاجازة علشان كله يعبر لكله عن حبه وعلشان المخاطيب ميتلككوش بالشغل ويعبروا اللى خاطبينهم _ مش علشان ضمنوهم يرموهم يعنى ولا ايه؟! _ وعقبالى اما الاقى حد يعبرنى ... بس انا كفاية عليا انتمتى حبيبتى !!...

وكل سنة وانتم بتحبوا بعض وبتحبوا حياتكم وراضيين بيها ..

و happy valentine's daaaaaaaaay.