سمى وادخل بماوسك اليمين!!

نظرة ..
فابتسامه..
فلقاء..

لا دى دقه قديمه!!!
دى هى طريقه التعارف زمان .. وبتتسمى زى مابيقولوا..
- الحب من النظرة الاولى-

او الاتنين يكونوا زمايل فى الجامعه.. يتعرفوا ويحبوا بعض..
كل دا ماشى..
لكن الجديد بقى .. الموضه.. الاستايل..
هو الحب الالكترونى
واذا كنا بنتكلم عن التطور والتكنولوجيا واللى لازم يطول كل شئ.. حتى الحب.. فظهر شكل جديد من الحب:
الشاب من دول يدخل النت ويقعد يدور.. يدور على البنت.. يتعرف عليها .. ومن اول تكيست ليهم تلقى كلمه الحب اتقالت!!
ياسلام!! سبحان الله.. لا شافها ولا شافته.. ولا عرف اساسا هى بنت ولا ولد..
– وكتير بيحصل ان الولد يكتشف انه كان بيحب ولد زيه!! –

ايه القواعد والقوانين اللى بتحكم الحب على النت؟!
وهل عقول الشباب بقت من التفاهه لدرجه انهم مش لاقيين بنت يحبوها فايدخلوا النت يدوروا عليها؟
طب والبنت؟ اهو الولد اسمه ولد!! اللهم لا اعتراض..
طب والبنت فين عقلها؟ هل ياترى مقتنعه ان الولد دا هايرتبط بيها بجد؟ وهل لاقيه ان الطريقه دى فيها شروط مناسبه لعلاقه جيدة؟!

وتلاقى كتير من الشباب كل هدفهم من دخول النت هو انه
(يظبط واحدة) زى مابيقولوا..
- ولا داعى اننا نذكر اللى بيدخلوا اساسا علشان نيتهم وحشه-

ليه ميكنش هدف البنت والولد من الحديث الافادة والاستفاده؟
انهم يتكلموا فى موضوعات تفيدهم .. تفتح مداركهم وتخلق جيل مثقف ينفع بلده... يتكلموا فى السياسه.. الدين.. الفن وحتى فى الحياه..
لكن البنت تدخل الشات تلقى ولد بيسألها سؤال كأنه طبيعى.. ومنطقى .. وأولى..
انتى مرتبطة؟! .. طيب بتحبى؟!
هو الشباب بقى كل هدفهم يحبوا ويتحبوا؟
طب لو هدفهم كدا يبقى كويس..
ولو ان اصلا مفيش جواز الايام دى ..
لكن هما بيدخلوا علشان حب وهمى .. تسليه.. كل اللى بينهم تيكست مكتوب عليه كلام والله اعلم صح ولا غلط..
ونسيوا ان الحب دا شئ متكامل .. مشاعر متبادله.. حنان .. عطاء.. تواصل – مسئوليه اولا واخيرا-
ليه بعدنا عن هدف النت الاساسى وهو الاستفادة.. ده حتى اسمه
" شبكة الا تصالات الدولية" يعنى هدفها تبادل الثقافات والمنافع
مش الحب الوهمى!!
وحتى الجوازات اللى حصلت من النت..اغلبها صفقات فاشله قايمه على المصلحه والطمع فى جنسيه او فلوس..
وما بنى على باطل فهو باطل..
وحب النت باطل – زى جواز عتريس وفؤاده بالظبط – يبقى جواز الشات ايه؟!
وحب النت باطل لانه مش بتتوافر فيه شروط الاتصال السليم اللى بيعتمد على صدق القول وتعبيرات الوجه.. نظرات العين والتعبيرات اللفظيه والاشارات وكل دا بيكون صورة متكامله عن الشخصيه مش مجرد (تيكست) عقيم لا يتوافر فيه الاحساس..

ليه نسينا شروط الجواز السليم اللى ذكرت فى القراَن:
" ولا جناح عليكم فيما عرضتم به من خطبه النساء او اكننتم فى انفسكم علم الله انكم ستذكرونهن ولكن لا تواعدوهن سرا إلا ان تقولوا قولا معروفا ولا تعزموا عقده النكاح حتى يبلغ الكتاب اجله واعلموا ان الله يعلم مافى انفسكم فاحذروه ان الله غفور حليم"
البقره :235
ياريت يا جماعه نفكر شويه .. هدفنا ايه من (كذا) اللى بنعمله قبل مانعمله.. وياريت البنت بالذات تفكر كويس لان البنت هى المسئوله فى الاول وفى الاخر( ودا فى المجتمع الشرقى) وإن كنت اختلف مع دا!!
ونفسى الولد لما يدخل الشات يسمى ويستعيذ بالله.. ويعاهد نفسه هايدخل علشان يفيد ويستفيد مش حاجه تانيه..

احب اعرف رايكم فى الموضوع عن الحب على الانترنت وهل حد عنده تجارب فى الموضوع دا يقدر يفيدنا بيها