انا بحب مصر!

جريدة المصرى اليوم عملت حملة او تظاهرة حب اسمها " مصر الحلوة" بمناسبة عيد الحب جابت فيها نماذج مشرفة من المصريين البسطاء و سألوا الناس عن احلى حاجة فى مصر ,

وبين تردد وعدم رد الناس .. سألت نفسى نفس السؤال :

هى ايه احلى حاجة فى مصر؟

انا دلوقتى هاغمض عينيا .. وانسى كل الحاجات اللى مضايقانى واللى بتضايقنى كل يوم فى مصر وهافتكر بس الحاجات اللى بتفرحنى..

وهافتح عينيا تانى _اكيد.. علشان اعرف اكتب!_ ....

وهاكتب كل الحاجات اللى بحبها فى مصر ..

امممممم

انا بحب مصر الرمز .. مصر الاصالة.. مصر البلد الطيبة واللى اهلها طيبين .. مش مصر الحكومة.. ولا مصر الكراسى والمناصب _اصل الدنيا فانية_

يعنى افتكر لما كنت صغيرة ولما كنت بلعب فى الشارع "تيكا على العالى واستغماية وكهربا و قفاشة الملك" كنت بحس ان مصر حلوة, ولما كنت باكل اكلة حلوة من ايد ست الحبايب كنت بحس ان مصر حلوة..

ولما كبرت .. و و انا بتمشى على النيل وباكل ذرة وترمس وسميط .. بحس ان مصر حلوة , وانا عند كريستينا صاحبتى باكل (فراخ وملوخية) وسط اهلها .. كنت حاسة ان مصر حلوة , وانا فى مجمع الاديان ولما سمعت اجراس الكنيسة مع صوت الاذان حسيت ان مصر حلوة,

وانا فى المتحف المصرى بشوف عظمة جدودى , وانا فى الساقية بحضر مهرجان الافلام اللى عاملينه الشباب , وانا فى ملتقى الادباء الشباب المبدعين حسيت ان مصر حلوة ..

لمتنا على السحور فى المسجد يوم ليلة القدر, وصلاة التراويح كل يوم والشيخ اللى صوته يشرح القلب , رمضان ولمة الاصحاب والاهل والعيد و البمب والهدوم الجديدة , ولما كل اسرتنا الصغيرة تتلم ونضحك من قلبنا.. كل دى حاجات بتقول ان مصر حلوة .. وحلوة اوى كمان... دوروا فى حياتكم كدا هاتلاقوا لحظات حلوة كتير عشتوها.. اللحظات دى فى مصر بلدنا .. يبقى اكيد اكيد .. مصر حلوة ..

لما رحت الفلاحين ومشيت على الترعة وشفت السواقى والجاموس ..والفراخ والكتاكيت والبط بيلعب .. وركبت ولامؤاخدة الحمار ..

والستات اللى لسة مصرين يخلفواويجيبوا عيال برغم كل مشاكل الحياة ..لا ويحبوا عيالهم ويراعوهم كمان.. حسيت ان مصر حلوة..

وانا بشجع مصر فى بطولة افريقيا قلبى كان بيرقص لانى كنت حاسة انى بحب مصر !

لما بشوف ضحكة راجل عجوز (بيمزمز فى الشاى) ومش شايل للدنيا هم .. او ضحكة طفل صغير لسة البراءة على وشه.. او شاب بيساعد ست عجوزة.. بحس ان مصر حلوة ..

الشعب دا طيب اوى وهموم وتلاهى الدنيا وسرعتها هو اللى مخلى ناسها مش بيبان عليهم الطيبة دى .. روح الشعب دا غير تصرفاته والروح دى بتظهر وقت الشدة وكلنا عارفين كدا .. ياريت نفتش عن الطيبة دى جوانا ونحاول نظهرها بالرغم من ضغوط الحياة وبلاش نفضل حاطين ايدينا على خدنا ونقول الحكومة بتعمل وتسوى .. لازم نتحرك .. لازم التغيير يبدأ من الشارع مش من فوق .. مننا احنا .. لو اظهرنا طيبتنا وراعينا ربنا فى شغلنا وحياتنا .. مصر هاتبقى احلى واحلى ..

بس تصدقوا انا بحب مصر؟!........