تانى هانتكلم على المنتخب .. بس المرة دى مش علشان نهلل لفوزه ولا نبارك الانجاز العظيم .. انا هاحط ايديا على نقطتين _من وجهة نظرى _ فى غاية الاهمية .. والحاجتين دول لاحظتهم بعد انتهاء البطولة الافريقية ..
اول حاجة لفتت انتباهى .. كم عروض الاحتراف اللى جت للعيبة المنتخب _ وكأنهم مكانوش شايفنهم قبل البطولة !_ زى ابو تريكة والحضرى وغيرهم كتير .. طيب هو لما دول يمشوا .. المنتخب هايفضل فيه مين ؟! خاصة وان احنا داخلين على تصفيات كاس العالم ومحتاجين كل لاعب علشان نقدر حتى نتأهل ليه ..والموضوع دا مسئولية مين .. انا صراحة مش عارفة ..
تانى حاجة وهى الاهم .. بعد رجوع المنتخب ,كل المهتمين بالكورة - وحتى اللى مش مهتمين - راحوا علشان يستقبلوا المنتخب فى المطار ويفرحوا بيه (ودا على اساس ان المنتخب هايخرج فى اتوبيس مكشوف علشان يحيي جمهوره ) راح الجمهور ملقاش المنتخب !
خرج من المطار سرا .. المدهش بقى اننا سمعنا تانى يوم فى كل الجرايد والتليفزيونات ان منتخبنا العزيز" راح ".. وخدوا بالكم من كلمة راح دى .. راح دبى علشان يتكرم فى استاد دبى قبل مايتكرم فى بلده مصر فى استاد القاهرة .. ودا بحجة ايه ؟ علشان يفرحوا الجالية المصرية هناك ..طيب هما يفرحوا الف ولا الفين ولا الاولى يفرحوا 80 مليون الاول ؟!
وكمان هو لو حد عاوز يجيب هدية لحد يقوله تعالى لى لما اديهالك ولا يجيبهالو فى بلده ؟ او على راى واحد صعيدى فى العاشرة مساء :
" هو العريس بيروح لقرايبه علشان يلم النقطة ؟! " .. الامارات كلها على عينا وعلى راسنا و صحيح حاكم دبى راجل بيحب مصر لكن برده المنظر مكنش لطيف .. قالوا انهم برده كرموا العراق بعد حصولها على بطولة اسيا .. ماشى بس دا لان ظروفهم الامنية متسمحش انهم يتكرموا فى بلدهم .. لكن مصر بلد حر ومش محتل .
والاكثر ادهاشا بقى هو " العلب" اللى خدوها اللعيبة وشكلهم وهما بيدوروا فى الملعب بيها .. بصراحة منظر مستفز .. زى مانكون فرحانين بالعطية ! واللى يغيظك اكتر بقى .. ان مجلس الادراة بالكامل اخد هدايا _ خصوصا ان احد اعضاء مجلس الادراة عضو فى مجلس الشعب _ دا غير الصحفيين والجهاز الفنى ورئاسة الاتحاد واعضاؤه .. يلا ماهى هيصة ! ...لا وايه _ الجنازة حارة والميت كلب _ قصدى والهدية " ساعة " قال يعنى اللعيبة محتاجة ساعات _ دول على قلبهم قد كدا _ ! برده مننساش نذكر انه تم تاجيل الدورى المصرى لحين الانتهاء من الزيارة وان الرئيس مبارك كان " بالصدفة" فى زيارة للامارات فقال يسلم عليهم هناك _ لا تعليق ! _
وانا بتفرج على الموضوع دا نط فى دماغى على طول المنحة اللى اداها حاكم الشارقة _ الامارات برده _ لاتحاد الكُتاب " علشان علاج الكُتاب " وبجد حسيت بالاهانة .. طيب انت بتحب مصر اوى وعاوز تساعد اتحاد الكُتاب قدم المنحة ومش لازم تقول هى لأيه .. والاتحاد ياخد الفلوس يوجهها زى ماهو عاوز .. لكن مش تقول دى للعلاج وكأن مصر مش قادرة تصرف على كُتابها ؟! وبصراحة احترمت منطق "صافيناز كاظم " الصحفية المشاغبة لما قالت, ان احنا ككُتاب وصحفيين لينا حرية ننتقد كل اللى احنا شايفين انه مخطئ سواء محليا او عربيا ,ولو جينا فى يوم وانتقدنا حاكم الشارقة او اى تصرف فى دولة الاماراات هاتبدأ نبرة المعايرة حتى لو مجتش منهم هاتيجى من اى حد هايقولولنا " اختشوا على دمكم مش هما دول اللى صرفوا على علاجكم .. بتعضوا الايد اللى اتمدت لكم ؟!"وبصراحة هايكون ليهم حق يبقى ليه محمد سلماوى " رئيس الاتحاد " يحطنا فى موقف زى دا ؟! ..
طيب قالوا ان حاكم الشارقة اتعلم فى كلية الزراعة المصرية وان مصر ليها جمايل عليه .. طيب وحاكم دبى ؟!
هى ايه حكاية الامارات بالظبط ؟ هاتصرف علينا كمان .. بعد كدا هاناخد مصروفنا منها ؟!
وكل اما نقول مصر مش محتاجة حاجة من حد يقولوا دى مصر زماااااان كانت بتعلم الدول العربية كلهم ! وكانت بتوردلهم مساطر وكشاكيل واقلام .. يعنى هى مصر لما كانت غنية كانت بتصرف عليهم ولما افتقرنا الامارات حست انها لازم ترد الجميل وتتكفل بكُتابنا ولاعبينا وتصرف عليهم ؟!
والادهى بقى ان الموضوع مطلعش جديد وان مش بس اللعيبة هما اللى بياخدوا هدايا دا حتى الوزرا و اعضاء مجلس الشعب بياخدوا هدايا ومش مدركين لحساسية دورهم فى البلد .. واوضح مثال ساعة " وزير الاعلام المبجل انس الفقى " واللى قالوا انها بحوالى 990 الف جنيه يعنى قربت على المليون وقالوا كمان انها منحة من حاكم عربى ! لما الوزرا بياخدوا هدايا يبقى الصحفيين واعضاء اتحاد الكورة ليهم حق!!
انا كمصرية بعلن شعورى بالاهانة للتصرفات دى .. يظهر ان مبارك كبر وخرف ومش مدرك للاوضاع اللى بيحط مصر فيها ..والبلد فعلا بقى حاميها حراميها .. حسبى الله ونعم الوكيل ..
.jpg)
هناك 9 تعليقات:
معاكى حق يا آيار حاجة مستفزة طبعا انهم قال ايه يتكرموا فى الامارات قبل ما ييجوا مصر
وبعدين حكاية الهدايا دى من زماااااااان هى جت على ساعة انس
يا بنتى امال العرب ليه بيعتقدوا انهم ممكن يشترونا بفلوسهم !!
لا وايه يا ايناس قال المنتخب يعملوا له حفلة فى مصر يسيب الحفلة فى نصها ولا ويعملوها بفلوس كمان يعنى فى دبى تبقى ببلاش وهنا بفلوس بلد خربانة والله
انا شايفاكى متحامله شويه على الامارات ايه يعنى مالنتخب يروح هناك ولا ييجى هنا هى مصر كانت اشتريته بفلوسها هما حرين
ثانيا الريس سلم عليهم واستقلبلهم في المطار لما وصلوا ،رحلهم بقى هناك بعد كده ولا جه هنا عادى يعنى هو حر برده فرحان ياستى سيبيه يفرح مصر فلحت في حاجة
اعتقد بقى اننا شاغلين نفسنا بحاجات ملهاش لازمة وسايبن الاهم
كمان انا حاجة عايزة اقولها على ماعتقد يعنى انى تصفيات كاس العالم المنتخب بيضم لاعبيه اللى حتى بيلعب بره بعقد احتراف يعنى مش هياثر عليهم
تانى حاجة بقى ايه يعنى اما الامارات تقدم اعانه للكتاب مش احسن لما يقدمها دول اوربيه او امريكا
منقدرش طبعا نتكلم على اعانة امريكا لانها بالملايين لكن الامارات لا لازم نتكلم
على فكرة دول الخليج كلانت بتقدم اعانات لمصر من زمان ومش اول ولا عاشر مرة حتى خصوصا بعد الحروب اللى مصر دخلتها والاعانة اللى المفروض نقول عليها بتهينا وتدوس على كرامتنا هى اعانة امريكا واللى مصر فعلا بتفكر انها تخليها لسداد مديوناتها وانها تقل كل سنة لغايه ممصر تقدر تستغنى عنها
اما اعضاء مجلس الشعب وكده انا معاكى المفروض ميكونش ليهم هدايا من الامارات لان مين اللى عالم باسبابها والاولى بالفلوس ديه انهم يقدموها للمشروعات التنمويه افضل متدخل في جيوب اعضاء مجلس شعبنا الموقر ويكون ليها ابعاد سياسيه
موئة: والله يا حبيبتى انا مقلتش راى فى مدونتى الا ومعجبكيش لكن ماعلينا دى وجهات نظر وان كنت اختلف مع اغلب اللى قولتيه يعنى تفكترى انى فرحانة بالمعونةالامريكية ؟ لكن برده مش فرحانة ان اى دولة غير مصر تصرف على كتابها علشان حرية الكلمة فى مصر وانا اتضايقت ان المنتخب راح الامارات قبل مايحتفل فى مصر لكن مفيهاش حاجة لو كنا احتفلنا بيه هنا وبعد كدا راح فى الحتة اللى تعجبه دا غير انهم لما افتكروا وعملولهم حفلة فى مصر كان الحضرى سافر والدخول كان بفلوس واللعيبة والجهاز الفنى سابوا الحفلة بعد الفقرة الاولى علشان مش هايهبروا زى الامارات..
انا معاكى جدا يا ايار فى رايك ......وعارفة ده اللى مخلى مصر معندهاش اى كرامة ده حتى فى ابسط الحاجات واحنا اللى عملنا كده فى نفسنا على راى الشاعر اللى
قال :
نسب الدهر والعيب فينا... وليس فى الدهر عيب سوانا
بس عايزة اقولك بقى بجد الموضوع جميل واسلوبك اجمل
شكرا يا خوخة وربنا يخليكى ياقمر
صح والله حاجة تكسف المصريين دول كسفنا فى كل مكان بيجروا ورا الفلوس وخلاص قال يعنى هما محتاجين
وزى ما انتى قولتلى يا ايار لما الدورة خلصت الجمهور راح يستقبلهم اغلبهم مكنش موجود عشان محترفين
وشكرا على العرض الجميل للموضوع
العفو يانهى وتابعى موضوعاتى دايما باذن الله
بجد ياايار انا اول مره ادخل واقراء كلامك الجميل ده بجد اسلوبك رائع وبجد فعلا كل كلمه قولتيهامعاكى حق فيها بد ربنا يوفقك يارب
إرسال تعليق