شفت حلقة فى برنامج " الحقيقة " لوائل الابراشى على قناة دريم بتاريخ 12-2 عن قانون جديد اصدرته محكمة القضاء الادراى بيقضى بحق البهائيين فى وضع علامة او شرطة امام خانة الديانة ..
سالت ايناس صاحبتى هما مين البهائيين دول؟
قالتلى دول اصحاب ديانه... قلتلها :يعنى غير الاسلام والمسيحية واليهودية؟ قالتلى :اه . قلتلها :انا فعلا سمعت عنهم قبل كدا لكن معرفش عنهم حاجة..
واتفرجت على الحلقة.. بس قبل ماقولكم انطباعاتى عن الحلقة احب اقولكم بعض المعلومات اللى انا جمعتها عن البهائيين وديانتهم....
المعلومات دى انا جمعتها من موقع اسمهwww.bahai.com
واللى عامله احد البهائيين ..
ممكن تطلعوا عليه _بس اوعوا يلعبوا فى دماغكم!_ المهم
اهم الحاجات اللى عرفتها ان ديانتهم بدأت فى ايران ,وانها ديانة سماوية_ازاى معرفش مع ان القرأن وضح الاديان السماوية ومكنش فيهم البهائية!!_ وكمان انها تشترك فى نشاطات الامم المتحدة على انها منظمة عالمية غير حكومية _هى منظمة ولا ديانة ولا ايه بالظبط؟_ وتحظى باهتمام وافر فى المجالس الدولية ,وان قبلتهم جبل الكرمل فى حيفا باسرائيل _ لاتعليق!
-والديانة دى انتشرت على تلات مراحل المرحلة الاولى: بدأت عام 1844 وقادها الشيخ الاحسائى فى ايران والمرحلة دى مهدت وبشرت بظهور دين جديد_ زى مابنسمع كدا فى الافلام العربى ايام الجاهليه... لقد اتى محمد بدين جديد!_ ثم تولى الدعوة بعد ذلك تلميذ الشيخ الاحسائى وهو الشيخ كاظم الرشتى بعد وفاته .
المرحلة التانية: بدأت بظهور البابية (واللفظ دا مأخوذ اساسا من الطرق الشيعية), وبدأت فى مدينة شيراز , قادها السيد على محمد والذى لقب بعد كدا بالشيرازى.. واخر هذه المراحل: هو ميرزا حسين على النورى الملقب ببهاء الله والذى ارسى دعائم الديانه واصدر تعاليمها فى كتاب يسمى" بالكتاب الاقدس" _ واشمعنى الاقدس الله اعلم يمكن علشان يبقى الاقدس الذى لا يفوقه اى الكتب فى القدسية؟ ... يمكن!_ وبعد ذلك انتقلت البهائية للعديد من الدول منها مصر وتحديدا فى عام 1864 _ ياااااه دا من زمان اوى يعنى من 144 سنة وكل دا ولا نسمع عنهم .. غريبة دى!_
مخبيش عليكم ان الموقع دا بكل كلامه استفزنى اوى دا بعد الاستفزاز اللى عملهولى البرنامج طبعا , واللى استوقفنى ولفت اتباهى.. بعض مبادئ الديانة اللى عرضها الموقع واللى هاركز عليها وعاوزاكم تحكموا معايا:
- فيه مبدأ بيقول ان البهائية تنشد الحرية فى الامتثال لاحكام الله. _ واللى فهمته من الكلام دا اننا قصدى انهم احرار يسمعواكلام ربنا او يبلطجوا.. براحتهم!_
-مبدأ تانى انه لاوجود فى الدين البهائى لكهنه ولا رهبان ولا رجال دين _ ولا رجال دين؟ امال مين اللى بيدعوا عندهم للدين ؟! _
و لا قديسين ولا اولياء _ مع ان دكتور عبد الرؤوف الدكتور البهائى اللى كان جايبه وائل الابراشى كان عمال كل شوية يقول يامولانا يامولانا ..يقصد الشيخ يوسف البدرى الداعية الاسلامى!_
- كمان العبادة فيه خالية من الطقوس والمراسيم وتؤدى صلاته على انفراد وتميل احكامه لتهذيب النفس اكتر منها للعقاب, وعدد ايام صيامهم تسعه _ معنى كدا انه خفف احكام الدين تماما ودا بيدعو اكثر لاتباعه لان النفس تهوى ما يخفف عنها !_
- اهم مبدأ بقى واللى عصبنى ونرفزنى بجد انه بيقول ايه:
لايخالف الدين البهائى فى جوهره المبادئ الروحانية الخالدة التى نزلت على الانبياء _ لحد كدا حلو.._ وانما تباينت عنها قوانينه واحكامه وفقا لمقتضيات العصر ومتطلبات الحضارة . _ واللى فهمته برده من الكلام دا ان اللى خلاهم ينشئوا الدين دا متطلبات العصر الحديث .. ياسلام ..!_
_ من المبادئ التى جاء بها الدين البهائى مبدأ وحدة الاديان ودوام تعاقبها. _ معنى كدا انهم بيعتقدوا ان الاسلام مش الدين المتمم وان الرسول مش خاتم النبيين والاكتر كمان انه فتح المجال لديانات اخرى حتى بعد البهائية لو تغيرت ظروف العصر مرة تانية! .. بالزمة دا كلام ؟!_
دى اغلب المبادئ اللى استوقفتنى لكن كمان حسيت وانا بقرأ حاجات من كتابهم المقدس انه فيه كلمات كتير شبيهه بالكلام اللى احنا بنقوله كمسلمين كمان بيقولوا انهم مؤمنين بالاسلام طيب ليه مش بيدخلوا فيه؟؟؟؟
انتقل بقى دلوقتى للبرنامج:
وائل الابراشى فى بداية البرنامج قال انهم كانوا فى الخفاء وظهروا للنور ..ودا احسن من منطلق " اعرف عدوك" وقال كمان انهم بدأوا ينتشروا جدا فى جميع دول العالم مش مصر بس..
استضاف البرنامج دكتور اسنان اسمه رؤوف هندى وهو بهائى ودكتورة اسنان اسمها بسمة جمال برده بهائية _ مش عارفة ايه حكاية دكاترة الاسنان لكن اللى استنتجته انهم اصحاب ديانه غريبة لكنهم فى نفس الوقت محتلين مناصب عاليةجدا ..ماشاء الله!_ دكتور رؤوف دا كلامنجى اوى حتى مداش فرصة لدكتورة بسمة ..وهو كمان اللى رفع الدعوة وخد فيها حكم ,استضاف كمان الشيخ يوسف البدرى الداعية الاسلامى وهو احد المهتمين بقضية البهائيين وبصراحة عجبنى رأيه بالرغم من ان دكتور رؤوف مدالوش فرصة يتكلم وكذلك وائل الابراشى وكأنها مؤامرة لاثبات فكر البهائيين دون غيرهم والتقليل من شأن الاسلام..
ركز البرنامج على موضوع الحكم القضائى الذى صدر بأحقيه البهائيين فى وضع علامة او شرطة فى خانة الديانة دون الدخول فى مسألة العقيدة..طيب ليه ظهرت المشكلة دى دلوقتى قالوا انها ظهرت بعد موضوع الرقم القومى لان مصلحة الاحوال المدنية رفضت كتابة اى ديانه اخرى سوى الاسلام او المسيحية او اليهودية واجبرتهم على تحرير اوراقهم باحدى هذه الديانات! وهما بزعمهم انهم مش عاوزين يبقوا منافقين لانهم مش بيعتنقوا الديانات دى..
وقال الدكتور رؤوف ان ابنه ليه شهادة فيها الديانه (اخرى) واولاده التانيين لا ,فسر الشيخ يوسف العملية انه دا كان ايام المحاكم المختلطة فى مصر لان الاجانب هما اللى كانوا بيحكموا وطبعا ادوا الحق للبهائيين لان الاجانب من مصلحتهم خلق الفرقة ولما جت حكومة الثورة رفضت الموضوع دا وفضلوا مهمشين فترة طويلة لكنهم دلوقتى رجعوا للظهور.. لا وايه ..بقرار من المحكمة وكان الجدل حول دور القرار دا فى اشعال الثورة ام اخمادها.. وانا فى رايي , وكمان دا كان راى الشيخ يوسف.. ان الدولة كدا بدأت تعترف بيهم وان دا تمهيد ان يكون لهم محافل ودور عبادة وغيره وبالفعل عرض البرنامج مقابر مخصصه ليهم.. الخوف بقى من انتشار الديانه دى وكثرة مريديها لان كمان كتبهم منتشرة وبعض شبابهم منتشرين فى الجامعات! وصاحبتى حكتلى عن خالها انه اعتنق الديانة دى فترة لحد ما مامته بلغت عنه واتحبس فعلا وكمان صحفى كبير زى حسين امين بيكار اعتنق البهائية .. دى كارثة!..
ماهو لو الدولة بتطبق الشريعه الاسلامية يبقوا دول مرتدين ولازم يقام عليهم الحد .. لكن الدولة بتطبق القانون الفرنسى وغافلة عنهم وفى حيثيات الحكم قالوا ان دى ديانة فاسدة ومخربة وانهم اصدورا القرار دا علشان يميزوهم علشان ميتسربوش فى الدولة .. طيب هو الدولة بتأوييهم ليه من اساسه ؟!.. هو احنا نأويهم ونطلعلهم قوانين ونبنيلهم مقابر وفى الاخر نرجع نقول دا دين فاسد ومخرب لعقيدتنا!
الشيخ يوسف قال انه هايطعن فى الحكم لالغائه زى ما الغى قبل كدا قرار بكتابة بهائى فى خانة الديانه, لكن انا بقى من رأيي اننا بقينا بين نارين لو كتبناهم يبقى بنعترف بيهم ولو مكتبناهمش هايندسوا بينا تحت اى ديانة يبقى مفيش غير حل تهميشهم ولو عرفنا يبقى ابعادهم كمان, مش يبقوا دكاترة فى الجامعة وبيدرسوا لاولادنا وبينشروا فكرهم كمان ولا انتوا ايه رأيكم !!
.jpg)
.jpg)
.jpg)
.jpg)
